雷凱欣峰殺 藍燕憤露了

雷凱欣、日本AV女優周防雪子和內地女星藍燕前晚「胸」降銅鑼灣行人專用區，出席《3D肉蒲團之極樂寶鑑》首映禮。三女坐上人力車於鬧市穿梭，吸引過百途人圍觀。其中一名坐着輪椅的市民，見到性感女星現身竟突站立，並送鮮花給有份出席首映的石詠莉，令人嘖嘖稱奇。而附近商場亦加設鐵馬，以防場面失控。

幫輪椅人士站立

身穿性感開胸裝的雷凱欣搶盡其他女星風頭，她表示只貼了乳貼和薄胸墊避免凸點。她說：「我每日只食早餐，最緊要靚。我用咗兩個鐘去貼膠紙，包保唔走光。」對於輪椅人士能夠站立，她說：「都好，都幫到人，睇完部戲能醫百病！」

周防雪子不及雷凱欣「偉大」，惟有頻頻俯身吸引鏡頭。

藍燕不甘被搶風頭，喪擺甫士博搶鏡。

藍燕穿長裙以高貴打扮示人，但眼見風頭被雷凱欣搶盡，嬲到自行將長裙拉高走光博出位。事後她句句有骨寸爆雷凱欣：「我同性感拉唔上關係，我係骨感唔係大隻美，我係走演戲路線。（雷凱欣咩路線？）唔知，大家可以唔同，以前有楊貴妃都有林黛玉啦！（咁你又拍三級片？）莎朗史東都拍過啦！」同樣走光的周防雪子則非常大方讚雷凱欣可愛。

周防雪子坐人力車時不顧儀態。

原本坐輪椅的男士見石詠莉行近，即站起來送上鮮花。

性愛場面冇3D

另外，昨日來睇首映的紅星名人眾多，何超盈偕Moiselle太子爺陳柏熹捧場，有內地傳媒亦專誠來港睇反應。而電影中只有武打場面才有3D效果，性愛場面則欠奉。雷凱欣戲份少並只有數秒露兩點，露點戲則由原紗央莉和周防雪子負責。由於對白有粗口和性器官字眼，令觀眾發笑。據知，電影公司以拍戲為理由作出申請，故可在行人專用區舉行首映。

文：影視組