陳茵媺搏殺港姐鮮味「實力股」

無綫姐仔買少見少，稱得上筍盤的不是名花有主，就是極難高攀。不過，自從陳茵媺(Aimme)的出現，為三色台帶來清泉，至少她沒有經歷風霜摧殘，且極具潛力，儘管最近跟陳豪扯上關係，但一日未公開戀情，一日都是上等「實力股」。

始終是港姐冠軍，聽個名已經夠煞食，何況Aimme正值上位時期，難怪愈來愈多宅男對她產生幻想。綜觀大家對她幻想有三，第一樣靚，第二身材好，第三英文好，足夠了吧！港姐冠軍好少留短髮，除了陳法蓉，大家又數得出有哪幾個。Aimme這頭清爽的短髮，也成了她的Trademark，亦跟其爽朗的性格緊緊相扣，教人如何可以不愛她。

講到拍拖，Aimme雙眼如星，除了期盼，就是期盼，可惜的是：「女仔幾歲都鍾意拍拖啦，都想有人錫，都想有人陪。不過我事業正處於搏殺期，真係冇時間拍拖，我冇時間喎，就算同個男仔一齊都唔會有好結果啦，如果係好鍾意佢就更加大鑊，預期失敗，不如唔好開始，都係順其自然啦！」