江若琳爆惡爺有鋪癮 馬德鐘為學絕技送上門
不懂煮食的江若琳，遇上廚藝高手馬德鐘，大談下廚樂之餘，還笑談演藝路，馬德鐘指自己遇上事業低潮時，幸得黃日華、羅嘉良鼓勵，才能捱得過。江若琳還爆馬德鐘有鋪整嘢癮，為學絕技，不惜冒昧上別人家作客。
江：江若琳 馬：馬德鐘
江：我記得第一次見你，真係唔敢同你講嘢，因為當時你着咗古裝、黐咗鬚，好霸氣，同你拍戲時，真係唔敢NG，你啲對白實在太熟，同你合作壓力好大，但拍到中段，先發覺原來你好鍾意笑，不過因為黐咗鬚，要就住嚟笑，見到你合埋口hohoho咁笑個樣，覺得你好可愛！咁你第一次見到我嘅時候，覺得我點呀？
馬：我就覺得你個人好開心，好開朗。有啲女仔畀人感覺會有啲隔膜，但你就好親切，一見到就知可以傾偈，係好玩得嘅女仔。
江：咁係咪好似成個男人咁呢？
馬：咁你都有女性吸引力，只係性格爽朗啫！
江：哈哈，入行咁耐，都冇人讚過我有吸引力呀！
馬：唔係嘛，咁唔識貨？
大笑一輪，繼續訪問。
似軍隊並肩作戰
江：同你做戲，好有感覺，尤其係驚嘅戲，因為你好惡，畀你鬧，真係會好驚！
馬：我演戲會好認真，同你合作嗰套《洪武三十二》，我要由皇爺變成為皇帝，喺宮廷入面，成日要起晒弶，好少有輕鬆嘅時候，所以好惡。
江：好彩，我喺戲入面做永陽公主，唯一一個可以嗲皇四哥嘅人，你喺戲入面對我都唔算好惡，記得有次你同陳倩揚做對手戲，你要扮發癲大吵大鬧，陳倩揚真係畀你嚇親，驚得好緊要。cut機之後，你都有去安慰佢。我都幾鍾意拍劇，感覺好似一家人，你仲成日收埋我對鞋添！
馬：係好似一支軍隊咁一齊並肩作戰一樣。
江我今次訪問你，其實有樣嘢好想爆，係關於你一啲私人事，因為我打從心底好欣賞你，你除咗演戲叻，仲好有學習精神，有次你見到我助手嘅爸爸幫我整咗把風扇，呢把風扇係用菲林整出嚟，非常之強力，你覺得好特別，叫我助手嘅爸爸幫手整多一把畀你，之後助手同我講，原來你仲親自打畀佢，話想上佢屋企學整風扇，我助手嘅爸爸及媽咪都唔敢相信，仲話「吓？馬德鐘上我哋屋企？」
馬：我對整嘢真係幾有興趣，細個見爸爸整嘢，都會跟佢整，最鍾意將收音機拆過再砌番。
江：我都好奇你學整風扇後，會整畀邊個呢？
馬：我上去唔只係學一樣嘢，因為你助手嘅爸爸嗰門技術好廣泛，我哋有同事部電話整花咗，佢幫手翻新，簡直新嘅一樣，呢個技術幫到好多人，我學識咗整風扇，最想送畀啲拍檔，我上大陸拍戲，羅嘉良見到都想要。
入廚型男 夫妻互信
江：你同阿嫂識咗十八年，我都好有幸曾經參加過你爸爸嘅生日會，見到阿嫂，覺得佢好靚，你哋真係郎才女貌，係好難得嘅一對，其實做呢行，成日要飛嚟飛去，你哋點維持呢段婚姻？
馬：真係好靠大家互相信任，好多人可能需要好多自己時間，但我需要好少，得幾個鐘頭休息，我都會去做司機，接送屋企人，我返大陸拍戲，太太都會嚟探我。
江：你望住太太、囝囝嗰樣，真係好sweet，你真係個和藹可親嘅爸爸、好老公。講開又講，你囝囝都好靚仔，有冇諗過畀佢入呢行呢？同你呢個型爸一齊做少女殺手？
馬：冇諗過，如果佢想，我會同佢講清楚入行嘅利害關係，入呢行要承受好多方面壓力，心理上，競爭上都有，係好辛苦。
江：我知你係廚藝高手，仲出過烹飪書，我都好鍾意食嘢，食完一碟飯仲可以加碟意粉，但我就唔識整嘢食。
馬：你真係好食得，我依家都比較少煮嘢食，其實煮嘅過程唔難，難在要抽時間去街市買餸。
江：你鍾意整西餐定中菜？
馬；我比較鍾意煮西餐，記得有年聖誕節，我喺元朗屋企門外，放咗張枱，煮咗龍蝦、豬手同意粉，點埋蠟燭，一家人坐低傾吓偈，食吓嘢，感覺好溫馨。
江：咁型嘅男士，仲識得煮嘢，真係無得頂！你太太最鍾意食你整啲乜嘢？
馬；佢煮嘢都好叻，屋企嘅工人都係佢教，所以冇乜特別，反而囝囝好鍾意我整粟米雞柳飯畀佢食。佢口味似我，我鍾意有汁，唔鍾意「乾爭爭」，多啲汁就啱晒。
低潮獲聲援 頂硬上
江：你以前做過G4，係咪好受歡迎？同你依家拍嘅《飛虎》都幾似，會唔會易啲演？
馬：都會，拍嘅時候都幾得心應手，不過以前嘅我唔係有型，都好瘦架喎。
江；講開又講，點解你會由G4轉做藝員？你知唔知我個化妝師話好鍾意你以前一個便服廣告。
馬：TVB都係因為呢個廣告搵我，當時仲有高層同我講，你入嚟啦，我哋會捧你架。點知入咗嚟好多年都冇。
江：遇到事業低潮，有冇後悔過入咗呢行？
馬：當年我喺警察部做過唔同嘅部門，當時覺得繼續做，前景會預測得到，我份人幾鍾意做啲新嘢，轉吓環境，又好似幾好，佢哋話一兩年會捧我，入嚟之後，要捱好耐，但我知唔關公司事，我睇番你，就知道點解。自己當年實在太蠢，同你合作拍劇，你對白又記得熟，演戲又好，我從未見過你NG，我入行到依家，講真中間有後悔過，有懷疑過自己係咪唔得，好彩當時有黃日華、羅嘉良同我講啲鼓勵說話，咁先至可以捱過去。
江：佢哋講啲乜嘢說話安慰你？
馬：大概都係「覺得你得架」之類嘅說話，幫我打咗支強心針，頂一頂。
江：你入行之後，唔經唔覺都拍咗超過七十套劇，咁多作品中，最滿意邊一部？我就最鍾意《衝上雲霄》喇。
馬：《衝》劇劇本確實寫得好，加上啲拍檔又一流，好似吳鎮宇咁，出嚟嘅感覺真係好好；但我就幾鍾意《酒店風雲》，我覺得幾啱我演，感覺亦正亦邪。
玉女變身「爆炸強」
馬德鐘爆斯文玉女江若琳，竟然有個花名叫「爆炸強」！江若琳笑言：「其實爆炸強前身係江富強，點解我會有呢個名，係因為我喺ＴＶＢ拍劇時，每個人都會有個裝古裝衫嘅箱，箱上面會寫低自己個名，有日我返到廠，因為太攰，坐咗喺無綫資深武師江富強個箱前面，謝天華見到就叫我做江富強喇。」
點解江富強會變成爆炸強呢？馬德鐘說：「有次佢喺化妝間，因為電話冇電就叉電，點知一叉即刻爆咗，當時好多人都聽到爆炸聲，化妝間有成一行嘅照鏡位停晒電，之後個個都話唔再畀江若琳喺化妝間叉電。」
文：影視組
攝影：黎志輝
場地：Table 18
馬德鐘 服裝：Swank
江若琳 髮型：Match @ HAIR
化妝：諺瞳小白＠PicturesqueGate