何超儀贈「興」爆粗寸爭產

饒舌組合LMF前晚於九展舉行告別演唱會，貫徹壞男人形象繼續搖滾，以粗口歌唱出對社會不滿；LMF請了何超儀的樂隊Josie & the Uni Boys、組合24味及黃貫中（Paul）做表演嘉賓，由何超儀大唱LMF粗口歌《冚家拎》揭開序幕，這首歌正是早前何家爭產時，被何超儀上載於Facebook的其中一首歌，甚有諷刺意味！

陳子聰被扯褲

超儀在台上表現癲狂大嗌：「見點呀？好多謝大家咁有耐性聽我唱歌，得唔得呀？小女子何超組咗呢隊樂隊，其實都有一段時間，今日終於有個名分。」high爆的她擲水落台，問：「邊個口渴？每人一滴啦！」老公陳子聰在台下撐場，當他走近台邊時，更被熱情觀眾扯褲，場面爆笑。

陳子聰被熱情觀眾扯褲，十分爆笑。

吳彥祖在台下為好友打氣。

觀眾違例煲煙

當主角LMF準備出場前，歌迷爆粗大叫「回水」，LMF出場唱《揸緊中指》興奮吶喊：「最後一次喎！用晒啲力，盡情發洩！」又感激Paul的參與，笑說：「佢太積極，我哋太懶，所以一直唔同佢玩（音樂）。」前晚吳彥祖、鄭希怡、李璨琛等到場支持，一如以往歌迷未有理會告示，依舊於室內違例煲煙，又帶同酒精飲品入場，更與LMF齊齊於台上台下爆粗、亂掟水樽及硬物，期間有觀眾high爆玩「插水」，氣氛熱爆。

黃貫中力撐ＬＭＦ，掀起高潮。

觀眾high爆玩「插水」。

採訪：音樂組