周防雪子純情輸蝕唧胸自救
日本AV女優周防雪子昨日突收起性感，改以AKB48純情look為新片宣傳，卻慘遭同場的谷胸雷凱欣與離罩藍燕左右夾擊，周防雪子不甘捱打，即醒水自動波唧胸自救，反敗為勝。
周防雪子、雷凱欣、藍燕、葉山豪、何華超等，昨齊集西九龍中心宣傳新片《3D肉蒲團之極樂寶鑑》，周防雪子以純情間條短裙示人，雖然樂於與現場男fans玩抬轎遊戲，即使有身體接觸亦冇詐型，但卻被雷凱欣及藍燕搶盡鏡頭。
雷凱欣負傷彎腰
周防雪子透過翻譯說：「我鍾意AKB48，所以用呢個形象見大家。（畀雷凱欣搶晒鏡？）冇呀，我咁着咪仲突出！（同男fans玩遊戲尷尬？）玩得好開心、好喜悅，我怕佢兩個覺得我太重頂唔順咋！」訪問完畢，雪子即醒水自動波唧胸，成功反搶鏡。
雷凱欣透露負傷上陣，她說：「呢輪日日宣傳，忙到返屋企即撻落床瞓，搞到腰傷冇時間睇醫生。其實我出親嚟宣傳都好乖，就算腰傷都有烏低身，公司啲女同事話女仔條腰都好重要架，逼我快啲去睇醫生。」
葉山豪則獲電影公司送上香艷蛋糕預祝4月10日的生日，他說：「我36歲仔，太太喺日本，冇得一齊慶祝。（太太唔鍾意你同雷凱欣太熟？）最近忙宣傳，所以多咗一齊。我太太雖然未見過雷凱欣，但知佢係邊個，佢嚟香港我會介紹佢哋認識。」
文：影視組