梁詠琪難忍3年一調狠飛Matthew
梁詠琪（GiGi）跟老外男友Matthew的一年情火速玩完，有指去年北京演唱會後，兩人感情已轉淡，早前原定赴日過二人世界，她突然改去西班牙，冇預男友。慘被狠撇的Matthew，昨日落寞洗車，無聊到咬手指打發時間，頹到爆！
GiGi自跟鄭伊健分手後，雖先後戀上法籍男友Sly和被本報獨家報道，與駐港美國領事館發言人Matthew撻着，可惜戀情都是無疾而終，據知，Matthew雖然有一份理想職業，可惜兩人始終不能再進一步。
感雙重冇癮
據知情人士透露，上月25日是GiGi生日，Matthew一早安排陪女友去日本浪漫慶祝，怎料遇上3．11日本大地震，將計劃打散，GiGi臨時改變主意去西班牙旅行三星期，分隔兩地令Matthew心情低落。加上去年聖誕，Matthew高調去北京睇女友演唱會，誰料竟被冷待，一時安排他入後台，一時又叫他去台前睇騷，卻又沒有預留座位給他，令他十分冇隱。亦有指Matthew任期滿三年明年會被調走，三年一調是分手另一原因。
對分手一事，GiGi回覆本報說：「私人事唔回應。」其經理人則指GiGi一直冇承認拍拖，雙方只是好朋友，問GiGi是否捨不得家人和事業才分手？經理人說：「佢緊張事業係成熟諗法。（GiGi依家感情生活？）一直單身，冇拍拖。」至於昨日有雜誌影到GiGi跟男子密會，經理人指二人相識十多年，並無發展機會。
落寞咬手指
昨午約4點半，被撇的Matthew一支公駕銀色寶馬離家到屋企附近的油站等洗車，只見他獨個兒呆坐車內，木無表情，之後就坐在油站的櫈上，神情落寞咬手指，一會兒行入油站商店行來行去，百無聊賴冇幫襯，表現頹爆，洗完車後就走人。
此外，GiGi好友楊采妮跟舊愛邱韶智復合蜜遊新加坡，采妮經理人作出否認：「采妮去新加坡係支持心潔舞台劇，畀人影到相，咁佢哋分咗手都仲係好朋友，邱生喺嗰邊做東道主好正常。」
文：音樂組 攝影：追蹤組