因《吸血新世紀》而撻着的羅拔柏迪臣與姬絲汀史釗活，由於男方認為與其沒時間見面倒不如提出分手，不過姬絲汀想等「浪子」回頭，希望忙完與他再續前緣。
正忙於宣傳新片《情約奇藝坊》的羅拔與女友姬絲汀離離合合多次，又傳過想拉埋天窗。不過最近再因雙方太忙而沒有時間見面以致感情出現危機。
有指二人平時只會在《吸血新世紀》片場內相聚，連平日出吓街拍拖見面或者傾電話的時間亦十分少，羅拔最近出席如金球獎及鄉謠音樂頒獎禮都是單丁出席，即使與姬絲汀一同睇戲又被粉絲撞破。
因此，羅拔向姬絲汀提出分手，想大家冷靜一下，而女方雖然不捨亦同意暫時分開。有指他們分手時有喊，不過雙方亦會保持朋友關係。姬絲汀希望等羅拔忙完宣傳新片後可以有望復合，羅拔的發言人拒絕就事件發言。
回復單身的羅拔宣傳新片《情》時即刻講在戲中如何與女「演員」調情，其實對象是戲中的大象女Tai！他有趣地表示：「我同Tai有路，不過只係純『糖關係』！」原來他知道Tai鍾意食甜嘢，所以鬼馬地在自己心口上灑了糖，搞到Tai成日跟住他，令工作人員都以為Tai「愛」上了羅拔。每當Tai去聞他心口時，他都會扮作無辜地說：「我都唔知點解佢會咁鍾意我。」認真抵死！
文：外娛組