鄭融大個女唔畀男人累

鄭融入行至今先後與劉浩龍及監製莊冬昕相戀，可惜兩段情未能開花結果，甚至令她賠上事業，有傳戀愛大過天的她掛住「瘟仔」而推工作，最終被公司雪藏。知錯的鄭融近年努力洗底，終獲星娛樂續約做「一姐」，阿融昨日束起馬尾盛裝出席「鄭融明日之后簽約發佈會」，獲側田、鄧紫棋及王菀之短片祝賀，大會除宣布鄭融的經理人約同時簽給星娛樂，還安排兩名赤裸上身的男模伴住她，獲男模兩度錫面的她更開心得大叫。

親口認單身

身為老闆的薛嘉麟除為鄭融戴上后冠，更宣布今年會豪斥千萬元力捧她，並入紙申請紅館檔期，誓要打造她為「明日之后」。被踢爆與監製男友莊冬昕分手的鄭融大方承認說：「過去式啦，現在式係自己一個，單身。（以後會聽話？）呢個係工作應有嘅態度。（以前掛住拍拖？）依家大個女同成熟咗。（唔諗拍拖？）順其自然，又冇人追，依家乜都好順利。」隨即擺出「Good」字手勢！對於，模特兒女友諸葛梓岐自爆婚期要押後至明年，準丈夫的薛嘉麟以「私人事」拒回應，他說：「今日係阿融記者會，想尊重番佢。」

心情靚爆的鄭融揚言自己已大個女，續約後會以工作為先。

薛嘉麟（右）豪擲千萬力谷鄭融，望她成為新天后。

採訪：音樂組