陳鍵鋒現身宣傳獲高層傍實
陳鍵鋒早前上有線向無綫作出控訴，昨日他出席無綫新劇活動時獲高層曾醒明傍實，兩人一唱一和力證關係不變，但鍵鋒直言自由身令機會增加不少。
陳鍵鋒、江若琳、謝天華、馬德鐘及徐子珊等昨日到奧海城宣傳新劇《洪武三十二》，眾演員均以古裝亮相，唯獨陳鍵鋒以時裝出席，顯得格格不入。早前陳鍵鋒接受有線訪問大呻對TVB的不滿，透露與TVB因幾十元人工拗得火紅火綠，昨日他獲外事部副總監曾醒明傍實到場，態度明顯軟化，曾醒明甫到場即說：「同鍵鋒食完飯，一路都合作愉快架！」
其後兩人孖住受訪，鍵鋒直言與TVB已沒有合約，上有線節目純粹分享個人感受：「依家身份獨立啲，比較罕見，上唔同平台係好事。（唔滿意嗰幾十蚊？）唔係針對咩公司同咩人，只係分享感覺，做個稱職嘅受訪者。」問到曾醒明是否吝嗇幾十蚊，鍵鋒亦出言維護：「唔好難為佢，都唔係佢同我傾！」
唔排除繼續爆料
至於會否怕得罪無綫？他即着曾生回答，曾生透露雙方仍有合作計劃，對方亦會上《今日VIP》受訪，問到屆時會否再爆料？鍵鋒說：「睇吓主持點引導啦！我冇避忌！（曾生傍住喎！）唔係，佢係路人甲咋！（再幫TVB拍劇？）睇劇本，唔介意再合作，係之前對成果太有期待。（要求加好多人工？）再傾！最好佢畀得心甘情願，我又樂意！」他表示最近自由身令機會增多，但避談是否「搵多咗」。
謝天華多激情戲
同場的天華表示不覺得風頭被搶，並自言每次傾合約都很順利，劇中演錦衣衞的他透露有不少打戲及激情戲，女對手更是「多到唔記得」！
而首次拍古裝劇的江若琳表示角色有公主病，希望不會嚇走異性，並自爆一直有追求者，但暫時未能令她心動：「到30歲佢哋仲等緊嘅話，我先考慮啦！其實我都想試吓一段轟轟烈烈嘅愛情！」
文：影視組