謝天華江若琳燒鵝情緣
江若琳（Elanne）與「Laughing哥」謝天華因合作拍劇而成為朋友，兩人的年齡、背景都不一樣，該沒有甚麼共同話題，事實上他倆卻很夾得來，走在一起會鬥吓嘴、傾吓心事，難怪在新劇被塑造成一對，更有段「燒鵝情」。開工時愛搞搞氣氛的天華，還為Elanne作歌，真係估佢唔到囉！
江：江若琳 謝：謝天華
Good fit拍檔
江：好開心請到我嘅好大佬嚟做訪問，我哋拍《學警狙擊》結緣，雖然只得一場戲咁大把，兩年後同你再合作拍《洪武三十二》，今次好多對手戲，我仲要愛上你呢個咁英嘅錦衣衞。
謝：《學警》嗰一場戲，最後仲剪埋添，所以觀眾都唔會知道我哋有對手戲。
江：哈哈！係呀，拍《洪武》喺三個幾月裏同甘共苦。最深刻係我哋要喺井底拍一場戲，井裏面嘅氣溫成四十度，我見到你已經面青口唇白，好辛苦，你仲叫我頂住。
謝：我都好記得，嗰場戲講你畀人掟咗落井，我吊威吔游繩落去，個井口實在大熱，我吊落去嘅時候都覺得自己好似啲燒鵝，井底下面又有另外一隻燒鵝等緊我，加埋就係兩隻燒鵝！
有人落閘起弶
江：當時真係「燒」到熟晒！你叫我頂住，話過咗呢關，好多嘢都可以頂得住。我好佩服你，點解可以演嗰樣似嗰樣，仲要咁得觀眾鍾意，究竟點樣去揣摩角色？
謝：我哋身邊每個朋友都有唔同性格，就地取材已經取之不盡，再加上每個角色嘅設計都有特性，只要放大啲、再強烈啲，個角色咪立體啲。
江：初初見到你嘅時候我都幾驚，覺得你好酷，加上你喺《學警》嘅角色好寸，行出嚟好大佬、好嚇人架！但今次再合作，先知道你原來好搞笑又玩得。
謝：我覺得開工最好等於娛樂，時間會快過啲，現場氣氛輕鬆啲，大家拍攝都會投入啲，你同我做咁多對手戲，要日對夜對幾個月，要有感覺、傾得偈，先會拍得開心。好似某啲場口會難啲深啲，溝通好啲，拍時自然更加得心應手，但講真，唔係人人都溝通到，有啲真係會閂晒閘，起晒弶，呢啲就要自己搞掂啦！
演出彈起
江：你真係好識同人溝通搞氣氛，有一次開咗好耐工好眼瞓，攰到趴咗落張枱度，你叫我：『喂，起身食嘢呀。』仲諗盡辦法等大家笑同精神啲。我拍戲個花名叫「江富強」，你就叫我整隻歌叫「江富強」，跟住就成日喺片場講：『江富強2011年主打力作超低能、勁搞笑。』然後就唱「超低能能能……勁搞笑笑笑……。」真係幾眼瞓都醒番！有次我有啲事唔開心，你用自己嘅經歷嚟安慰我，好多謝你。大家合作過兩個劇，你覺得我有冇乜嘢轉變？
謝：我覺得你嘅演技漸趨成熟，演《學警》嘅柔柔時可能因為年紀問題，你比較單向少少，到最近嘅永陽公主，你做到個角色由思想單純變為成熟，好有層次感。
江：你演過咁多角色，Laughing哥同《女人唔易做》嘅賤Man，兩個角色都做得好好，你鍾意邊個角色多啲？
唔會計算角色
謝：我兩個都好鍾意，賤Man令好多女士又愛又恨，最初憎到死，最後發覺原來係好男人，我感受到啲人反應轉變好大，我好享受呢個成果。至於Laughing哥亦係我深愛嘅角色，由出街冇人留意到我係臥底，到最後真相大白，啲反應炸到我飄上二樓，兩個角色嘅滿足感一樣咁大，要二選一嘅話，我鍾意Laughing哥多啲，因為吸引觀眾層面大啲。
江：接劇本時有冇諗過回響？
謝：我唔識去計呢啲嘢，不如花多啲時間去揣摩角色，我知有啲人會先計算過至諗接唔接，我覺得咁即係逃避現實，我每接一個角色，都會想辦法整到佢靚，咁樣滿足感仲大。
舞出彩虹
江：你初初入行係做無綫舞蹈員，你真係好鍾意跳舞，成日喺片場着住古裝都跳餐飽。
謝：係呀，我細細個已經喜歡跳跳紮，見到電視啲哥哥姐姐跳咪跟住跳，中五等放榜時，電視台招考舞蹈員，咪走去試吓，唔得又冇壞嘅。
江：一跳就跳咗五年，離開時人工得四千蚊？當時點生活？
謝：嗰時嘅生活指數都唔係咁高，不過都有捱過啦，但捱得辛苦都開心，因為自己喜歡嘅職業，亦學咗好多嘢，覺得值得。
江：你同朱永棠、陳小春當年組「風火海」，到依家感情仲好好，點維繫？
最老友係老婆
謝：靠電話，有時都會約出嚟見吓，始終大家嘅工作時間都好難就，所以都要等某某結婚先可以聚一聚見面，好彩依家有微博，可以好方便咁知道大家做緊乜。依家出嚟飲嘢傾偈嘅有洪天明、嘉樂A（錢嘉樂）同家樂B（吳家樂），歐陽震華、吳卓羲咁，不過只係開工做嘢，傾得吓偈已經好足夠，不過，數最老友，一定係我老婆！
江：你太太係咪好幫得你手？
謝：係呀，佢幫我好多嘢，我哋開工冇晒時間觀念，屋企嘅嘢全部都係佢打點晒，等我好安心，每日只係瞓覺、開工就得喇。
江：咁你有冇做啲浪漫嘢氹吓佢呀？例如煮幾味咁？
謝：唔需要開工我就喺屋企煮飯仔，煮啲家常嘢，廣東餸，蒸吓肉餅、水蛋咁，唔係太特別啫，但我用愛心去整喎，佢同囝囝都鍾意食。
磨出冠軍
江：結咗婚六年，會唔會諗啲特別嘅方法去慶祝結婚周年？
謝：第一年結婚周年記念，我哋去咗澳門玩笨豬跳，當時老婆都問我點解咁樣慶祝。我同佢講，結婚我都唔驚會驚笨豬跳？加上咁特別嘅慶祝方法，一定會記得，就因為第一年咁出位，之後二、三年都唔記得點慶祝喇，都係收工之後去食餐普通飯咁。
江：講到跳舞，07年你參加《舞動奇跡》，當時有個疑問，你好耐冇公開跳舞，點解會去參加呢個比賽呢？
由hea到有鬥心
謝：我當時係畀公司逼上去參加o架，我講都冇跳舞咁多年，唔識跳o架喇！但喺公司立場，梗係希望搵啲識跳舞同有經驗嘅藝人上去，穩定軍心，公司就叫我上去睇吓環境先，嗰時我啱啱拍完清裝劇，食到肥肥哋，點見得人呀？咪諗住抱住玩票心態，好可能第二、三場比賽就會被out出局，點知去到發覺所有參賽者都好認真，準備充足，紮定馬等我哋上嚟。個節目係好嚴肅嘅，當時我覺得大家作為香港代表，冇理由咁樣輸o架，就激發咗鬥心，用咗兩個月時間參加九場比賽，最後好好彩都贏咗冠軍。
江：過程好痛苦？
謝：又唔係好痛苦，只係幾攰吓，由朝排到晚，每日都跳濕幾件衫，返到酒店好似昏迷咁瞓，過番啲學生嘅生活，我仲覺得幾好玩，冇乜雜念，喺湖南排完舞就返酒店瞓，唔會有朋友半夜三更叫出去飲酒，生活好清純，係一種磨練。
天華口不對心
Elanne訪問天華當日，他拿着個電單車頭盔chok爆行入餐廳，原來他剛考取得電單車牌。新牌仔一年不能載人，他卻說一年後都不會載人，因擔心若有閃失，連累後座「搭客」。
但正式做訪問時，Elanne問他同一問題，天華的答案竟然不一樣：「電單車係我私人玩具，我比較自私，唔會同人分享。」天華口不對心，其實他是不想吹噓自己有幾好、有幾為人設想，做好事其實出心即可，這也是天華可愛之處！
文：影視組
攝影：黎志輝
場地：金牌小龍（皇室堡）
謝天華 服裝：Swank
江若琳 服裝：Marc by Marc Jacobs
髮型：James Lee @ HAIR
化裝：諺瞳小白＠PicturesqueGate