江芷妮思復出省招牌
前無綫女藝員江芷妮（Cherie）現已進軍美容界，更是兩店的老闆娘。近年絕迹幕前的她透露已考獲美容師執照，與時並進不斷自我增值。對於再次踏足娛樂圈，她不置可否表示要看機會。
曾於娛樂圈打滾了六年的江芷妮，於06年毅然決定轉投美容界，她表示當初作這樣的決定亦非常掙扎：「其實喺TVB真係做得好開心，但自己又貪靚想接觸下美容行業，最後因為怕自己嘅時間分配唔好，所以先決定轉行。」
揼本分享靚嘢
為了開展人生新一頁，Cherie坦言這幾年來亦投放很多心機及時間，同時更考獲美容師執照，並分享自己的開店念頭：「我希望搵多啲靚嘢同人分享，可以幫到人變靚、增強自信心，自己嘅滿足感都大啲！」Cherie早前已開了第二間美容院，問她是否已豬籠入水？她即笑言：「我都幾揼本o架，我唔想用啲差嘅物料，所以將大部分收入又再買儀器，其實唔係真係賺好多！」
仍聯絡圈中人
已成為兩店之老闆娘的Cherie似乎已達到她的目標，但她卻謙虛表示離目標尚有一段距離。問到在美容界已佔一席位的她會否心癢癢再戰娛樂圈？她不置可否說：「其實我都想保持番自己個知名度，咁樣可能具說服力啲，如果有適合嘅我都會繼續做，但會以兼顧到自己舖頭為先。」她又透露仍有與圈中人保持聯絡，但都是幕後工作人員。
文：影視組
攝：沈健程
場地：SkinPro@馬鞍山分店