麥浚龍：做歌手好孤獨

麥浚龍早前推出全新專輯《無念》，但忙於為電影《小雙俠》開工的他，分身乏術以致新碟幾乎零宣傳，他坦言自己愛上拍電影：「做歌手係好孤獨，因為永遠只有自己，但係電影就唔同，除咗摸索角色嗰陣係孤獨之外，平日開工身邊隨時有70個人，呢個工作環境令我好安心。」

目標做導演

由《破事兒》開始麥浚龍便片約不斷，他直言自己的戲路很好，不過他的終極目標是當導演：「依家喺片場會睇吓人哋點打燈、鏡頭點擺、導演會點同演員溝通，慢慢學習。」麥浚龍表示電影中的自己是沒有限制的，就像電影《復仇者之死》中，他飾演殺大肚婆的變態殺手：「觀眾會知道係電影，唔會影響平日對麥浚龍嘅睇法。」

孤獨感無阻麥浚龍對歌唱的熱誠。

有一班工作人員陪住拍《小雙俠》，麥浚龍不再孤獨。

曾失去自我

他坦言人愈大對很多事情的看法已經不同：「我好開心，細細個已經自己搵錢自己使，不過其他人總係放咗焦點喺第二度。依家嘅我係『可以同需要嘅問題』，我可以踎喺雲吞麵舖食麵，亦都可以去高級酒店食麵，兩樣我都會好開心。」

麥浚龍坦言從前的自己抽離不到歌手與真人的分別：「個人成日都好緊張，好似之前拍戲就令成個人都好繃緊，放咗三個星期假之後，成個人輕鬆咗、開心咗，諗法亦唔同咗，令人生變得簡單好多！」或許麥浚龍正是步入「無念」的初階，人愈漸成長，要求及心態的改變令生活變得簡單自在。

文：盧坤穎　攝：唐豁莊