詩雅家樂歡喜冤家癡纏扮sweet
有「翻版徐熙媛」之稱的英皇女星詩雅，與同公司的陳家樂老友鬼鬼，非常合拍，接受訪問時更互讚對方，詩雅更和家樂大玩深情對望，又扮翹手、咀嘴，親暱如小情人。
英皇歡喜冤家詩雅和陳家樂，早前為「香港國際電影節」的「香港四重奏Ⅱ」之《天機洩》拍攝短片，詩雅於短片內與影后惠英紅合演母女；家樂則與徐天佑飾演警察。
封惠英紅偶像
詩雅直言見到偶像兼影后小紅姐相當緊張，她說：「之前同佢食過飯，佢好好人，冇架子，好nice，我有睇佢以前啲電影，好似《霸王花》，我同家姐試過喺屋企扮佢喺《霸》嘅角色，真係好搞笑，小紅姐係我偶像，佢好快投入，而且轉數好快。」
至於家樂則與天佑結片緣，他的外形驟眼看有點像剛出道時的天佑，連家樂自己亦認同：「天佑出道時，我啲同學都話我似佢，我之前未見過佢真人，有次去食飯，小紅姐第一眼都認錯我係佢，依家我就唔似佢，因為佢留長頭髮同留鬚，man咗好多。」
大玩翹手扮咀
訪問期間，詩雅和家樂鬧着玩情深對望及翹手扮咀嘴，狀甚親暱。詩雅大讚家樂相當勤力，每拍完一場戲便會睇playback研究拍攝細節；家樂則表示詩雅人緣甚佳，而且演技不俗。
採訪：戶冊平
攝影：司徒國榮
場地：gi+
服裝：esclusivi（on 陳家樂）