Amanda S.「煮」意太多 未婚夫唔受氹
名模Amanda S.、蔣怡、丁子高及趙增熹昨日出席DBS信用卡活動。Amanda表示常為未婚夫下廚：「以前做錯嘢，煮嘢食畀佢就冇事。不過依家煮得太多，變到冇乜用。」近期忙於辦婚禮及開甜品店的她，被問會否親自炮製結婚蛋糕？她說：「唔會啦，但係已經諗好個蛋糕點整，會搵人整。（忙到冇時間生B？）今年一定唔得，雖然好想有BB，但要開咗舖先，穩定咗先生。」
同場的丁子高表示老婆千嬅廚藝了得：「例如炒蟹同秘製咖喱雞。（喺條頸嗰種？）呢個唔可以拎出嚟畀大家，我自己食。」問到有關千嬅稱拍拖被第三者騷擾一事，他開玩笑地說：「其實嗰個係我，係我扮聲打畀佢，其實我一直追咗佢好耐。（有冇問係邊個？）冇呀，都冇乜好問。」
