Eason韌力爆燈撩交打
陳奕迅（Eason）最近接拍果汁廣告，與千幾個新鮮橙做「對手戲」。雖然Eason的十字韌帶曾經受傷，但貪玩的他全程紮紮跳，更自誇身手敏捷，適合拍武打片。
Eason一向是廣告商寵兒，最近第四度與果汁品牌合作拍廣告。為求效果逼真，拍攝時動用過千新鮮橙，Eason躺在鮮橙上十足小朋友玩「波波池」一樣壯觀。他興奮地說：「第一次喺同一個地方見到咁多鮮橙，仲可以體驗瞓喺上面嘅感覺，同過千個鮮橙『同浴』，感覺好得意。」
被讚身手敏捷
為免浪費食物，Eason坐下時分外小心，因擔心自己體形過重會壓爆橙。他說：「大家千祈唔好浪費，拍完記得帶番屋企享用。」
廣告中有不少動作鏡頭，因Eason早前左腳十字韌帶斷裂，所以拍攝一場避開地上不停滾動的橙時，大家只要求他輕輕跳起，但Eason依然非常賣力，除了大動作跳躍，更來回奔跑數十次，被眾人激讚身手敏捷。Eason說：「我身手真係唔錯，如果有導演要拍攝武打片，真係可以考慮一吓我。」
明年才做手術
不過Eason的工作檔期排得密麻麻，預計要待明年才有期做手術。他無奈地說：「依家惟有不停鍛煉大腿以上肌肉，代替十字韌帶嘅運作。」
此外，Eason早前為亞視拍攝音樂特輯《觸動‧陳奕迅》，化身職業司機接觸不同階層市民，並會播放由太太和一眾好友梁漢文、蘇永康、房祖名等拍攝的新歌《最後派對》MTV。
文：專案組