蔡楓華唔傻分阿倫身家

再戰樂壇的蔡楓華在Star Hall舉行一連三場演唱會，前晚他共換了四套衫，全晚黑超、帽不離身，開場時表現緊張的阿Ken，甩嘴唱錯歌詞，但之後他愈唱愈順。阿Ken更邀得校長阿倫擔任表演嘉賓，一身黑衣人打扮的阿倫戴上眼鏡，笑言配合阿Ken造型，兩人合唱《酒紅色的心》。

五行打後係醫生

阿倫要阿Ken擺個chok甫士，他笑說：「我成日見你喺活動都擺chok樣。」阿倫表示今次做嘉賓有個任務：「有人同我講頭五行打後嘅全部係醫生嚟，依家我幫你澄清，你講嘢有紋有路，好人好姐，邊有嘢啫。」阿Ken談到第一次在「QE」（灣仔伊館）舉行演唱會，阿倫即抵死笑問：「吓！喺醫院？」

從未試過在紅館舉行演唱會的阿Ken，整晚多次提到紅館，恨在紅館開騷恨到開口叫林建名幫他完成心願，還說：「如果蝕錢，我蔡楓華唔收錢。」更打蛇隨棍上邀阿倫做他紅館嘉賓，阿倫說：「唔係話嚟就嚟，我驚畀人噓。」阿Ken即說：「我啲fans即係你啲fans，你啲fans即係我啲fans。」阿倫笑言不介意fans撈亂，點知阿Ken反應極快說：「我都想同你啲錢撈亂使。」阿倫即笑說：「你真係唔係傻架噃！」令人捧腹大笑。

蔡楓華獻唱之餘，還大顯舞姿。

蔡楓華揚言開演唱會為的是名譽、地位及尊嚴。

自詡80年代巨星

阿Ken在台上指過去發生很多事，但做人不能夠向後望，要向前看，他又以「生不如死」來形容過去十年的奮鬥史：「最緊要有顆善良心，上天都畀機會自己，全香港支持蔡楓華，唔係同情蔡楓華。」他坦言開演唱會為名譽、地位及尊嚴，他說：「衰衰哋都係80年代巨星，依家唔會話自己係歌星，只係小小歌手。」最後演唱會在兩度「安哥」後完騷。

文：音樂組