張智霖自揭戀事 靚靚眼濕濕

Chilam前晚假紅館舉行《我係外星人演唱會2011》，全場爆滿，太太袁詠儀及囝囝慕童、伍詠薇、李心潔夫婦、諸葛梓岐跟未婚夫薛嘉麟、沈嘉偉一家、趙學而等捧場。Chilam配合外星人主題，以太空船帶領出場，並有多個Cyber造型示人，跟性感女dancers大跳辣身舞，令人喜出望外。期間，Chilam以同一造型、同一唱腔演繹已故巨星張國榮當年演唱會的精華片段向偶像致敬，邊唱《想你》邊自摸及除衫，露出六舊腹肌，他說：「我只想對呢位歌手講一句：『I miss you so much！』」

伍姑娘變豬頭

演唱會後半部分，Chilam在台上訴說跟靚靚之間由拍拖、結婚到生仔的戀愛過程，他一度哽咽說：「當時好多朋友反對我公開戀情，覺得會斷一個偶像歌手嘅財路，雖然如果冇公開的話，呢個演唱會可能會早十年發生，不過唔緊要，我冇後悔過，亦多謝你賜一個家同埋一個小朋友畀我！」Chilam深情獻唱靚靚主演的電影歌曲《新不了情》外，更分別向靚靚及慕童唱出《骨膠原》及《反斗奇兵》，螢幕不停播放他一家的生活照，搞到全場動容，台下的靚靚感動到眼濕濕，身旁的伍詠薇更哭成淚人，現場的螢幕直擊靚靚的表情，她不忘向鏡頭隔空向老公咀嘴，而Chilam立即出手捉住飛吻，認真肉麻！

張智霖說起與靚靚的一段情不禁哽咽。

靚靚（左）聽到老公的深情剖白忍不住眼濕濕，在旁的伍姑娘卻已喊到變豬頭，十分感性。

爆阿智欲尋死

當晚，Chilam邀得草蜢及蔡卓妍（阿Sa）任嘉賓，他踢爆蔡一智曾心情低落到嗌自殺，他說：「當時佢打畀我係咁嗌要死，我都唔知點算，打畀Eason（陳奕迅）求救，點知Eason話：『冇嘢嘅，由佢啦！如果佢真係自殺，叫佢保佑我哋喺樂壇發光發熱。』」阿智坦言多得Chilam擔任社工，陪他度過人生的高低潮。

張智霖與草蜢的蔡一智（右）及蔡一傑又跳又唱，更突然來個後空翻。	放大圖片	（左起）薛嘉麟、諸葛梓岐、靚靚、伍詠薇和趙學而等齊撐張智霖。
沈嘉偉、邱淑貞	彭順、李心潔

採訪：音樂組