吹到啤一聲
不要低估啤啤熊的魔力，粉絲迷不乏男女老幼，就連美國時裝界瘋人Jeremy Scott都被迷倒，最近與adidas Crossover的ObyO Jeremy Scott波鞋，就以啤啤熊大頭設計賣點，群星力撐，呢鼓熱潮真係吹到「啤一聲」。但將可愛嘜頭着出型格味道絕非易事，功力少啲都出事，今期找來時裝達人Janice Wong點評誰是當中高手。
陳奕迅
陳奕迅身上太多Patterns，完全搶眼過對鞋，成個Look冇咗Focus位，着衫着出一個亮點已經好夠。如果問我，我一望就望條褲先，唔會係對鞋，若果換上淨色褲，令Total Look更佳。
少爺占
少爺占着得好普通，唔夠搶眼、唔夠時尚，如果件外套短身會好啲，對腳睇落好短，唔夠潮。
楊愛瑾
楊愛瑾無論個樣同服飾配襯都太過小可愛，會令人想起Hello Kitty，欠缺時尚味道，如果佢夠膽，可作中性打扮，着褲同要多Layering襯對啤啤波鞋。
蔡卓妍
蔡卓妍又戴眼鏡又着格仔衫，驟眼睇有點似林亞珍，充滿喜劇效果，有啲搞笑，如果着嚟拍喜劇會唔錯。
周麗淇
周麗淇個樣好Sweet，淨係個樣絕對Carry到呢對Cutie到震嘅波鞋，無論係開工衫定還是去街衫，應該都OK。
周柏豪
周柏豪着法比較多層次，襯條最典型瀨屎褲，好有日本街頭潮人feel，各方面都襯得恰到好處，突出番對鞋，着得好潮氣、好有型格。
兩色攻男女
ObyO Jeremy Scott啤啤熊波鞋有淺啡與淺紅色選擇，男女都啱着，雖然每對索價港幣$2,000，但絲毫沒令人對啤啤熊愛意冷卻，一推出就迅速賣斷市，真係有錢都未必買到，俗語有云：「千金難買心頭愛」嘛！
Janice Wong檔案
Janice Wong（王麗儀），時裝作家及博主，16年前首位為華語媒體遠赴歐美時裝周報道的時裝編輯。她常為香港及海外不少時裝設計比賽擔任評判，包括：時裝世界精英大獎（2010）、香港時裝節青年設計家創作比賽（2006）等等。美國CNN旗下亞洲生活時尚網站CNNGo.Com讚譽她為「香港首位真正的時裝權威」。最新暢銷著作《我的時尚騷靈》。