廖碧兒劃清界線：我冇影
廖碧兒去年被本報拍得與富二代林忠豪拍拖斷正，跟陳豪六年情玩完，大前日她與大肚姐姐在中環歎茶，對於陳豪直認與前女友有影過親密照，她即斬釘截鐵說：「我冇影（過）。」
最近緋聞纏身的廖碧兒，被指與林忠豪轉玩地下情，又傳會步佘詩曼後塵離開無綫，她卻懶理負面新聞，大前日大約四時，她與臨盆在即的胞姐在中環歎茶，席間更拿出手提電腦忙於睇相，只見她們不停手指指兼咬耳仔密斟，原來二人正在上網選購嬰兒車，二人逗留約一小時離開。
日日陪大肚家姐
戴上黑超的廖碧兒步出餐廳時，當記者上前問她可知林峯與潘霜霜床照、咀嘴相連番流出，她初時語帶輕鬆表示：「唔知，因為我家姐就嚟生，我日日陪住家姐，冇睇過雜誌。」
全程笑容滿臉的廖碧兒，直至記者提及陳豪直認曾與前女友亦影過親密照，問她與陳豪拍拖六年間可有影過？她即斬釘截鐵說：「我冇影（過），呢啲係佢講，唔關我事，私人嘢唔講呀。」然後友善地與記者道別，轉頭火速與姐姐離開。
dry爆超市掃貨
而陳豪自從與廖碧兒分手後，雖然被形容為「筍盤」，日前卻dry爆獨自在中環逛超市，可惜與廖碧兒緣慳一面。只見他化悲憤為食量，一個人買了一大袋美食，當排隊付款時，本來嘴扁扁木無表情的他，發現有記者在場，即臉露四萬笑容說：「我啱啱喺附近做完嘢，見順路咪過嚟買啲嘢囉，都買咗好多嘢食同家居用品。」說完便步行往的士站，沿途陳豪亦被不少途人認出眼望望，但他未有理會，急步往乘車返回將軍澳寓所。
文、攝：追蹤組