李妮行善升呢老公力撐
前亞姐李妮任職博愛總理兩年，早前正式被推選為博愛副主席，職權和工作範圍都擴大，李妮直言行善除了善心，更需要足夠的體力及家人的支持。
李妮從亞姐變成博愛總理，默默為慈善工作賣力，做了兩年總理後早前更被推選為博愛副主席，下月就職後正式上任，屆時要兼顧教育、中西醫療、籌募、社會服務及宣傳與推廣工作，李妮坦言：「好在工作都係平日，星期六、日可以留番嚟陪老公同照顧屋企，其實做善事除咗善心，體力都好重要，工作咁多，我哋開會經常都會由下午兩點開到八點，少啲精力都可能頂唔住。」
望仁美有好發展
能夠全情投入慈善工作，李妮感激丈夫的支持，她說：「最多謝所有人嘅信任，而老公知我就嚟做副主席，鼓勵我放多啲心機落去添，可能我將時間安排得好好，佢工作嘅時候我就做嘢，放假大家就一齊享受家庭生活，所以佢都唔係好覺得我少咗喺屋企。」
至於早前告別亞姐慈善組織仁美清叙，李妮說：「離開都有一段時間，希望佢哋會有好嘅發展。不過唔知係咪會長太忙，又要照顧小朋友，我上年10月辭職嗰陣已經通知佢有啲政府文件同會員資料喺我度需要交收，但到依家都未有人聯絡我，希望佢哋盡快聯絡番啦，呢啲文件可能對佢哋都有用。」
文：影視組