石詠莉獲揼本做港版Katy

性感組合Freeze正式解散後，三位成員各散東西，「有得留低」的石詠莉從此開始單飛發展的生涯，她直言有壓力：「老闆好爽快畀咗六位數字我造歌，不過今次由形象到揀咩歌都要自己負責晒，真係幾大工作量！」石詠莉透露屆時將會以新形象示人：「希望好似Katy Perry咁，性感得嚟又唔會好過火。」

說話會小心

早前她被指爆娛樂圈女星賣淫博宣傳，她坦言學識以後講說話會小心點：「其實我講嘢好蠢，以前出去做訪問都係陳樂榣講多啲，就算真係講錯嘢都有人幫手解釋，依家得番自己就要獨立啲、成熟啲。」重提當日的「賣淫」話題，向來心直口快的她說：「我只係講事實，老闆都冇話過我，佢唯一覺得我做錯就係點解要認錯，如果有人覺得我是非，咁係因為你唔了解件事，我唔會介意！」

自爆遭騙色

最近她為三級片《3D肉蒲團》唱主題曲，石詠莉表示有看過部分片段，問她可擔心影響形象？她謂：「歌手好難得先遇到好歌，呢次製作真係好揼本，個曲底係由中樂團造，我都係第一次同中樂團一齊錄音，其實首歌好抒情，係叫現代人唔好咁容易放手。」她自嘲是個對愛情死纏爛打的人，更經常被「飛」，她說：「我係付出唔問回報嘅人，記得十五、六歲嗰陣真係畀人騙財騙色，因為個男仔冇錢，咪畀晒啲零用錢佢囉，我覺得冇咩所謂，原來佢只係玩我，啲朋友都睇唔過眼同我講！」

文：音樂組　攝：李廣成