眾星悼念玉婆 埃及妖后最經典

甄子丹：珍惜眼前人，珍惜生命！

周秀娜：永遠會懷念佢嘅風姿，欣賞佢喺電影毫無保留咁演出，愛情方面又敢愛敢恨。

容祖兒：知道佢過身感到難過，最記得是佢演出的電影《埃及妖后》，裏面佢個埃及妖后造型成為經典，印象最深刻。

江若琳：知道佢係一位好出色嘅藝人，係一個傳奇人物，雖然佢已經七十幾歲，但係都仍然好有魅力。

白韻琹：記得1974年，我做梗頭等空姐，我未上飛機前，啲同事已經同我講，佢好大牌，叫我小心啲服侍佢，唔好得罪佢。我好清楚記得，佢同佢老公李察波頓喺頭等時，因為當時唔流行私人飛機，我諗佢怕畀人騷擾，所以佢包晒前後左右啲位，我第一眼見佢，佢就用塊布笠住自己個頭，叫我千祈唔好騷擾佢，佢乜都唔要食，但佢老公就好大食，乜都食一餐。（佢靚唔靚？）好靚，當年佢係好紅嘅時候，佢連坐飛機都着得好性感，有四個胸，好大條事業線，仲着老虎紋皮草，成個老虎乸。

謝賢：佢好靚o架喎，我都睇過佢好多經典電影，佢老咗都仲好靚，係影后嘛，（聽到佢死訊會唔會好唏噓？）冇得唏噓。

甘國亮：細時已經欣賞玉婆電影，你哋後生先叫佢玉婆，當年佢被形容為玉女。佢識得演戲，仲得到兩次金像獎。