林峯心噏拒回舊愛短訊

自被踢爆與火辣身材的潘霜霜相戀，並火速斬斷情絲後，阿峯一直寄情工作，前日他風塵僕僕飛北京出席頒獎禮，昨日便返港出席咖啡代言活動，雖然一臉疲態現身，但也交足功課於台上與粉絲大玩遊戲。

「美好的回憶」

阿峯直言每次想起今次事件都好心痛，說罷更眼泛淚光：「諗起一啲屬於自己嘅美好回憶好心噏，（係咪你太大方？）我向來唔鍾意解釋，今次係第一次承認同面對件事。」經過今次失手流出床照，問到日後拍拖會否收起女友手機及相機，阿峯聞言即哈哈大笑：「冇諗呢個問題，多謝大家氹我開心！」

雖然二人現已分手，但阿峯坦言沒有與對方聯絡：「冇啦！只係佢單方面傳短訊畀我，不過我冇覆佢囉！」他又不相信有報道指霜霜於09年已與老外John結婚並育有一子的事，更不知道原來霜霜與其好兄弟吳卓羲的緋聞女友張馨予乃好友關係！對於舊愛將於月底來港，問到有否擔心對方會踩上門找他？他搖頭表示冇諗到咁長遠。

纏綿劇照扮爆料

此外，有指吳卓羲與阿峯齊齊成為內地女子把玩對象，卓羲斥責此乃造謠者堆砌出來，不過他並未有聯絡受情傷的阿峯，怕打擾好友。而張馨予經理人昨日接受電話訪問時，透露馨予正忙於內地拍攝電影《戀夏戀夏戀戀下》，據她所了解，馨予和霜霜只見過一次面，根本沒有聯絡。

鑑於阿峯與霜霜床照曝光，有網友趁機瘋傳其他藝人的纏綿劇照，以亂視聽。繼有張靜初於電影《萬有引力》內與郭濤的親熱接吻照、吳鎮宇與內地女星姚迪在床上攬到實一實的照片，吳鎮宇昨日接受電話訪問時，表示無奈又好笑。

文：影視組