祖兒獲老闆開腔撐乖女
樂壇天后容祖兒乃英皇「一姐」，在圈中打滾逾十年，祖兒一向聽教聽話，深得公司上下人心，卻有報道指祖兒走紅後自把自為，不放經理人在眼內，英皇老闆楊受成親為祖兒辯護取回公道，炮轟報道失實。
剛放完兩個月悠長假期的祖兒，已重新投入工作，祖兒雖貴為樂壇天后，但待人親切，毫無架子，不過卻有報道指祖兒趁經理人霍汶希（Mani）去年遠赴美國進修，即自把自為放大假，無故推掉工作，向公司推薦友好取代Mani地位，當Mani完全無到，但得知激嬲即將復工執政的Mani，祖兒就飛到美國向Mani請罪。
親自批兩個月假
本報就傳聞向英皇求證，由老闆楊受成親自開腔為祖兒辯護，楊生炮轟《忽然1周》報道完全「老作」，楊生透露由他親自批祖兒放大假，由1月15至3月16日，他說：「去年八、九月祖兒未開演唱會前，跟我話完騷後想放三個月大假，到歐洲、美加休息，當時我話三個月太長要諗吓，不如放你兩個月，但我都要講服大哥（行政總裁吳雨），最終經大家同意答應畀佢放祖兒兩個月，昨日祖兒一早就打電話返公司銷假，正式投入工作。」
讚全公司最聽話
楊生力撐祖兒非自把自為的人，他說：「祖兒係全公司最聽話、最乖嘅藝人，佢係識諗嘅女仔，佢反而冇嬲，不過咁講對佢好唔公道，佢喺英皇十二年，第一次放咁長假期，打一份工咁耐，放兩個月假都不為過，我做老闆肯畀佢放咁耐，證明個伙記好乖，佢真係日日幫公司搵錢，個報道完全係作，唯一真嘅係Mani22號就返港，四月一日正式復工。」
充電後的祖兒在微博留言回來了，她感性地說：「喜歡現在的我，不用為證明自己而拚命，只為愛的事盡情付出，不會為不愛我的人而沮喪，只為愛我的人而感到幸福。」
文：音樂組