Chilam踏紅館靚靚甘做幕後

張智霖（Chilam）入行廿年，三月將舉行首個紅館個唱，自言會傾力演出的他，揚言不會擺家人上台，太太袁詠儀（靚靚）只會幕後發功擔任「票務總監」一職；而囝囝張慕童（魔童）則啟發他創作了《反斗奇兵》新歌。

Chilam將於三月廿六、廿七日假紅館舉行「張智霖我係外星人2011」演唱會，相信歌迷最關心的，就是Chilam的太太和囝囝可會一家三口破天荒同台演出，不過Chilam已一口否定說：「雖然我同靚靚未試過喺香港同台演出，但no啦，好悶呀，但佢哋一定會嚟分享我咁開心嘅一刻。」

問他靚靚擔任個唱哪一個「職位」？Chilam就指她專職門票事宜，因不少朋友要求訂飛，已令她不勝其煩，他說：「佢係『票務總監』，個個朋友都要訂飛，又要握手位，佢已經好辛苦。」Chilam補充已請得不少「勁人」擔任嘉賓，更開定「期票」：「仲有一位女神秘嘉賓，一定令大家好有驚喜，係你估唔到嘅。」

至於現年四歲的愛兒魔童，Chilam指他只會當觀眾，而新主打歌《反斗奇兵》則是他執筆填詞，首次為愛兒寫歌。問他為何有此構思，Chilam苦笑說：「因為佢真係好曳呀，佢額頭、牙同下巴全部都跌傷過，要入院縫針，最驚一次係佢話要攬住我做超人跳落街。」

問他可有被嚇怕而不敢再生BB？Chilam就話會順其自然，但如果有得揀，首選生仔，因為他是百分之百的呷醋外父：「我諗我唔會捨得個女嫁，一定會趕絕佢啲男朋友。」

採訪：音樂組

化妝：Hethy Kwong

髮型：Hin Wan＠il Colpo

服裝：I.T

場地：Neway CEO