苟姑娘怕醜女主動獻咀
苟芸慧（苟姑娘）是很多人心目中的女神，不愁無男士追求，但在新劇中她卻要主動向梁烈唯送吻示愛，性格怕醜、細膽的她笑言是大挑戰。
苟姑娘在新劇《飛虎》中本與馬德鐘是一對，但因受對方冷落而情歸對她細心照顧的梁烈唯（唯唯）。不過唯唯是馬德鐘下屬，故只能暗戀，害得苟姑娘要主動表白。日前拍攝這場戲時，苟姑娘為表認真，還要主動錫唯唯，拍攝前兩人不停排戲，有時唯唯會做鬼馬表情，逗得苟姑娘忍不住笑，但亦見二人默契十足。
第一次示愛
對於要做主動，苟姑娘坦言是挑戰，原來她咁大個女從未追過男仔，怕醜又細膽的她就算鍾意都唔會主動表達，但為了拍攝而第一次向人示愛：「始終係女仔嘛，媽咪教我哋要矜持o架，所以只有拍戲至會發生，（要錫面喎？）錫面都OK嘅。」
對於這個鬼馬拍檔，苟姑娘謂要扮很喜歡他，也怕忍不住笑，而且本身角色成熟，對住唯唯會令她變成小朋友，確有難度，不過唯唯也有其優點：「我鍾意風趣嘅男仔，因為另一半要對住一世，唔能夠太悶。」
至於有機會一親香澤的唯唯，則鬼馬的說：「錫面OK啦，錫嘴就太勁喇，暫時淺嘗一下先啦，（有冇畀佢電親？）佢畀我電親就真，佢覺得我好笑，可能佢已經畀我迷住，不過我有女友唔會亂諗。」
文：影視組