諸葛12月出嫁：我哋好誠實
諸葛梓岐（Marie）與Neway二少薛嘉麟屢傳婚訊，前晚她終首度承認年尾拉埋天窗，Marie未入門已樣樣聽從男友指示，婚禮一切由男友安排。但提到未來妯娌陳法拉的關係，即時「起弶」謂不會回應她的事。
Marie前晚為iBlues時裝騷擔任模特兒，被問到是否將於年尾結婚，她掩不住喜悅，甜笑承認：「我工作安排到十一月。（婚禮籌備成點？）睇男友點安排，（男友點求婚？）講咗佢會怕醜，男仔要型吖嘛！總之好浪漫同開心。（幾時？）希望十二月，細節睇吓男友點安排。（你嫁雞隨雞？）係。」Marie稱雙方家長已知情，指她媽咪好鍾意男友，對他印象不俗，問到她與未來奶奶相處如何？她稱：「相處得好好，都有一齊出嚟，我好鍾意佢，相信佢都鍾意我。（佢鍾意你多過鍾意陳法拉？）佢嘅嘢我唔答。」
唔會回應佢嘅嘢
Marie與法拉將成為妯娌，被問到兩人關係有否破冰，她即「起弶」說：「我唔會回應佢嘅嘢。（結婚搵佢做姊妹？）要安排吓，依家仲係三月頭好多嘢要安排，冇諗呢啲！（你同佢關係點？）好正常。（佢知否你結婚？）咁你問番佢。」至於過年有否收過法拉的利是，Marie謂過年時大家都不在港，沒有見過面。
美國求婚冇註冊
問Marie為何沒有戴訂婚戒指？她說：「我做嘢冇戴。（幾卡？）心意啫。（幾時求婚？）喺農曆新年嗰陣去咗美國玩，都係嗰排啦！（秘密註冊？）有一定同你哋講，我哋好誠實。」另外，被問到李澤楷同梁洛施分手，會唔會覺得嫁入豪門壓力大？她說：「愛情係講心，最緊要天時地利人和配合，其他嘢唔重要，有愛先最重要。」
文：名人組