靚靚照遊行：唔係派錢就算
財爺曾俊華的預算案遭全城狂插，昨日他突然轉軚派錢，謝安琪認為是「民意勝利」，但民憤還未平息，「噴火華」黃日華微博鬧爆，袁詠儀（靚靚）、黃貫中和袁彌明決繼續上街爭取到底。
財爺知衰轉軚宣布改派現金，似乎未能平息眾星怒火，當日有份鬧爆政府的靚靚仍不滿新方案未能解決民生問題：「建議佢啲智囊團要深入研究基層有咩需要，唔係派錢就算！（派咗錢，6日你仲上街遊行嗎？）無論佢派唔派錢，我都會去遊行。因為今次財政預算案唔夠完善，只不過依家作出讓步。其實點都會有人去遊行，始終住屋問題冇解決過。」靚靚揚言已經和友人商量，決定集腋成裘各人拿六千元去做善事。謝安琪認為今次是民意的勝利：「希望政府多啲以民為本嘅政策，解決民生嘅問題。」
噴火華：有事先補鑊
「噴火華」黃日華昨日在微博發火大鬧後知後覺，畀人鬧完先補鑊：「點解唔一早做好啲呢個職位，另聘高明吧！香港政府知道我和三哥（苗僑偉）要移民澳門後，先效法澳門政府，藉此挽留我哋留港，三哥你點睇呀！」之後華哥在電話中的火勢更勁：「香港政府見步行步，有事先嚟補鑊，應該一開始就做好啲，六千蚊對基層真係好重要，除咗解決經濟問題外，佢哋嘅心都會舒服啲。」
袁彌明黃貫中決上街
袁彌明更揚言不收貨會繼續出席遊行，她亦鬧爆：「一早都話佢要回水，唔知係咪財爺要面，依家咪又係要畀番啲錢市民，雖然派錢但我仍然會去遊行，仲有好多問題未解決。」至於Beyond成員黃貫中（Paul）亦對新方案未感滿意，指懂得轉軚都算聰明，由於他已約同友人一起去遊行，故要再作商量：「呢次遊行目的唔單止為咗嗰六千蚊，仲有樓價、就業、教育、醫療等政策仲未完善，行出嚟係要政府正視社會問題。」阿Paul又說最好將六千元捐出去，幫助弱勢社群，當幫政府做善事！
黃秋生則說：「依家窮人咁多才引起民憤，六千蚊等如攞水撲火！」詹瑞文亦大唱反調，認為派錢不是好方案，他說：「作用大唔大只有佢先至知，條數係佢計出嚟，派錢唔係最合適方法，佢之前決定太男人，少咗女人嘅心思，唔明白人心。」
文：專案組