陳司翰密嗒莊思明
身為拿督女兒、幾億身家的香港小姐季軍莊思明（Lisa），去年參選初期被爆與同性密友李詩藍（Brenda）的六年「斷背」關係後，性取向一直成疑，有指她隨即遭無綫高層打壓，為保港姐形象，勒令她極速斬纜。
一直恨入娛樂圈的Lisa，雖然被外界稱為「豬扒港姐」，但男人緣依然旺盛，她跟Brenda斬纜不久，曾先後與香港先生陳嘉裕及「巨聲幫」成員大孖周志文傳緋聞。自言現時冇拍拖的Lisa，最近被本報發現搭上天后陳慧琳（Kelly）的胞弟陳司翰（Victor），日前晚上9時許，兩人相約到位於灣仔星街一間餐廳撐枱腳。由於該餐廳的位置略為僻靜，人流較少，就算坐在當眼處亦不易被人察覺。
Lisa甜笑施冧招
席上見兩人有講有笑，傾得興起的Victor更不時手舞足蹈，動作多多，逗得Lisa不時甜笑；而Lisa就專心做個聆聽者，更施展冧仔本領，托着下巴含情脈脈的望着對方，又不時咪眼微笑，Victor顯得相當受落。逗留個多小時埋單走人，當Victor推門步出餐廳後，刻意按住門柄讓尾隨的Lisa步出，盡顯紳士風度。其後並肩而行往附近街頭取車，Lisa登上Victor的寶馬座駕後，二人未有即時開車，仍坐在車廂內聊天，傾談約十分鐘才開車離開，直駛銅鑼灣皇室堡對開的避車處停低，又繼續於車內吹水五分鐘，未幾見依依不捨的Lisa單拖落車，步行往附近卡拉OK消遣，而Victor則獨自驅車離開。
承認約會啱嘴形
事後記者致電Lisa求證，她說：「當日我的確係同陳司翰一齊，但我哋只係好傾得埋嘅朋友，唔係拍拖。（上次影到同大孖，你都話係朋友喎！）係啦，都唔知點解，每次同男性朋友出街都畀人影到。（陳司翰好似有女朋友喎！）以我所知就冇喇！（佢追你？）我感覺唔到喎！」提到是否因之前的斷背新聞嚇怕對方？她說：「唔關事嘅！可能係自己太男仔頭，所以男性朋友都當我係兄弟。」
