陳慧琳孖女起飛腳
潮媽陳慧琳（Kelly）懷孖女四個多月，日前她還與胞弟陳司翰（Victor）齊「嗒女」。Kelly於中環作產前檢查時，被追問孖女有否曳曳踢她，明顯肚凸凸的她，即嗒晒糖笑到四萬口任影唔嬲。至於Victor則「慢嗒」港姐莊思明，二人於灣仔蜜會撐枱腳撐足兩小時才返歸。
已有一子的陳慧琳（Kelly）向來恨女，早前她以人工受孕成功懷得孖女後，便已減少工作專心養胎，對腹中孖女甚為着緊的Kelly，早前還透露為谷肥B除了一日擦足四餐，又頻飲奶及吃鈣片，體重已增加了十多磅。而Kelly除了於飲食方面着手外，對產前檢查亦不敢掉以輕心，懷有四個多月孖女的她，這次懷胎的檢查次數，比年前懷有「蝦餃仔」劉昇更為頻密。
護孖女改着平底鞋
Kelly日前於下午時分，於經理人鍾珍及助手護駕下前往中環作檢查，當日天氣雖然已回暖，但為免着涼，Kelly穿上冷外套之餘，還加上了一件厚厚皮褸，出名是潮媽的她亦棄掉至愛的高踭鞋，改穿平底露趾涼鞋上陣。當戴上黑超的Kelly檢查後步出大廈時，甫見記者在場初時一臉愕然，但明顯肚凸凸的她被問到囡囡有否曳曳踢她時，Kelly聞「囡囡」兩字即笑不攏嘴，還嗒晒糖笑到四萬口說：「開始踢我喇，依家仲成日喺個肚郁吓郁吓。」
同蝦餃仔玩當運動
提到老公是否已戒煙，她亦說：「佢有冇戒就唔知，但唔會喺我面前食囉，佢都好緊張㗎，放工即刻返屋企陪我同陪個仔。（有沒有作產前運動?）我每日推蝦餃仔出花園玩車仔，推住佢喺花園咪當散步做運動囉。」Kelly更透露為了B女的健康，已戒掉每日必吃的即食麵，反而天天吃番茄及飲水鴨湯。
任影唔嬲的Kelly之後步上七人車時，見她的座駕上還掛了一個長髮洋娃娃，問她是否買定給女兒的玩具，Kelly只笑而不答，並與記者揮手道別。
文、攝：追蹤組