刻意追女 有失型格 林奕匡好色日日吹
陳柏宇師弟林奕匡以音樂才子形象殺入樂壇，醉心音樂的他更懂得玩五種樂器，當中以色士風尤其着迷，為此日日練奏吹出一口好的色士風。但他直言從未以色士風追女仔，他笑謂：「太刻意唔型呀！」
陳柏宇師弟林奕匡（Phil）外形斯文，帶點騷靈味道的唱腔，加上在唱碟中用上多種音樂元素，令他在芸芸新人中尤其突出。在加拿大讀大學時修讀科學的他，原來對音樂有濃厚興趣，除了唱歌，亦染指不同類型的樂器，曾學過色士風、長笛、結他、鋼琴等，但他最喜歡的始終係色士風。
貪型多變化
Phil在十二、三歲時已經開始學色士風，至今已經有十二年的經驗。當時他在加拿大讀中學，按校方要求選擇額外課程時而加入學校Band隊，學的樂器都流於表面工夫，令他感到厭悶。加入學校樂隊兩年後，Phil開始投入爵士樂的懷抱，舒服及長青的Jazz曲式，令他由那刻起愛上色士風：「因為佢好有味道，夾住人聲同樂器之間嘅音樂，而且又有好多變化。（貪佢夠型？）哈哈，都ＯＫ型啦！」
他表示學色士風最難的地方是「如何發聲」，要把它的聲音發揮得最好，絕對需要不斷摸索：「舉例彈琴咁，你行埋去彈就會有聲，個琴靚啲聲自然就靚，但係吹得出色士風嘅靚聲，就唔係一朝一夕嘅事，初學嗰陣，一個音符嘅大細聲、力氣控制都要慢慢練，我就練咗三、四年先開始控制到，之前吹親都好似嘈音！其實都幾複雜，不過最重要係個口腔點擺設，每日練少少就最好，輕鬆得嚟又可以培養興趣！」
效法楊丞琳
他表示現時都會抽空繼續練習色士風，希望自己可以嘗試不同的東西，令自己在樂壇更有競爭力。問林奕匡圈中的奮鬥對象，他即大讚同公司的楊丞琳及方珈悠：「我想好似楊丞琳咁全面，佢可愛又得成熟又得，做戲同唱歌同樣冇問題；方珈悠成日見到，佢教我好多待人接物、點處事嘅嘢，希望我可以好似佢咁，愈來愈搵到自己條路！」
色士風小常識 竹片要濕唔要攣
Phil表示吹奏色士風之前應將竹片放在口中數分鐘，令本身好乾的竹片變得濕潤，才能吹出聲音。他續指吹奏後，竹片要安放在特製的盒中，利用承托器確保竹片保持平直狀態，否則變攣的竹片會發出怪聲，每塊竹片約可用十至二十次。
他又以「撞車」比喻保養色士風之道，開車與吹色士風同樣要做足安全措施，千萬不要在食飽後吹奏色士風，增加食物殘渣黏住內裏的氣孔，令氣孔無法打開，影響吹奏。
藝人學色自我增值
現時不少歌手都有一技傍身，但是要突圍而出，只懂得鋼琴、結他這種較「大眾化」的樂器已經不夠，圈中不少藝人對色士風亦情有獨鍾，其中石修更是無師自通，非常厲害！
關智斌
曾經苦練色士風的關智斌，離開Boyz以後單飛推出的首張個人專輯，便有他吹奏的色士風版《眼紅館》及《最愛演唱會》，更演繹得有板有眼。
石修
石修對色士風的興趣緣於兒子陳宇琛，趁兒子上堂時偷師自通，除了在不少電視劇中「露兩手」外，早前他更在紀念鄧麗君的音樂會上以色士風演繹《千言萬語》。
文、攝：盧坤穎