吳啟華踢爆偉仔偷心賊

曾：曾華倩 吳：吳啟華

曾：啟華哥……你好！

吳：嘩，使唔使握手呀！乘機想摸吓我隻手？

曾：廿八年嚟都未摸過……不過「鞋」咗啲！我最深印象係你做戲好型。訓練班有次個人表演，你行出嚟，跟住喺褲袋摷張紙出嚟，然後搣爛丟咗就行開，嘩，演得好快，我都唔知你嗰場戲係做咩？唔夠一分鐘。嗰時我覺得呢個人好型，又好寸，但又好多女生鍾意，你喺我哋女生中好受歡迎，我都成日mark你o架！

吳：講靚仔邊輪到我呀，嗰時有黃偉良（沒有在這行發展）、大宇喺度，我又瘦蜢蜢！雖然我冇乜嘢講，但訓練班時我好合群，跟男同學一齊溝女，又互相幫對方講大話，有啲男同學好花心，早餐一個（女友），午餐又另一個，我唔講邊個啦……

全班最索

曾：我哋嗰時好嚴，同班嘅唔可以拍拖。

吳：你又唔同，你同高一班嘅師兄拍拖（乘機爆華倩、朝偉拍拖）。

曾：所以我哋要偷偷摸摸（好尷尬）。

吳：你以為偷摸啫，其實全部人都知。

曾：冇(目及)其他女同學咩？

吳：嗰時你係全班最索，但一早畀師兄搞掂咗，其他嗰啲……好似君如就癲癲哋，肯定唔係我追求對象，而劉嘉玲，佢都係其中一個索，身材係最好，但又覺得佢大陸味重咗啲……好似蠢蠢哋咁，而娥姐（商天娥）就大家姐咁啦！

曾：係咩？（大發現但又好冧）我廿八年後今日先知呢個秘密！

有女萬事足唔係大男人

曾：最開心階段係咪依家呢？又有老婆又有女？睇你吖，一講個女成個慈父樣出晒嚟！

吳：呢個階段係最開心，但我唔係做慈父，我忠、奸都做，都會打囡囡屁股！其實我由細到大都想有個溫暖家庭，所以有囡囡後心態好唔同，做乜嘢都會為囡囡着想多啲，有人話仔、女係成世包袱，我反而覺得好甜！

曾：再追多個仔仔？

吳：考慮緊，做父母都要花時間陪仔、女，我太太都有考慮，都有可能嘅。

曾：你想囡囡入行嗎？好似你跟太太都係合作拍戲而認識，你一家跟演藝事業很有緣？

吳：我就唔會想個女入行，不過都會等佢自己決定，因為我同太太都係一齊演《俠》而認識。

曾：係你追太太嗎？因為我覺得你有啲「大男人」feel？

吳：梗係我追啦！但我真係唔係「大男人」喎，係我遷就人多，以前的確係脾氣差，不過老咗反而脾氣好咗，可能人成長就會改進，做人唔可以一成不變嘅！

曾：依家喺你身邊嘅人就最舒服，（唔使受氣）哈哈。

吳：都係架！哈哈，希望大家（成班同學）生活愉快啦，更希望多啲一齊，以及希望一齊拍戲，我哋個個都有票房，我咪做奸角囉，希望有老闆支持我哋！

為錢做壞蛋妙手回春

曾：我哋好少拍檔，只係喺台灣拍過一個單元《俠義見青天》，我做個盲妹，你要強姦我！

吳：訓練班出嚟，做咗兩年茄哩啡冇表現，有諗過返英國讀書，嗰時連奸角都未有得做，茶客甲咋，都幾受打擊，後來接演《魔域桃源》，係奸角但都係第二男主角，好多戲，都算係一個機會，之後有《妙手仁心》、《倚天屠龍記》，其中《妙手》都係代表作。

曾：《妙手》直情係你嘅轉捩點！你真係成個醫生咁，我全家都係做醫生（意思係好有權威去評價），形象咁好，咁有冇女仔借啲意要你打針？又有冇女仔同你講唔舒服要你幫佢聽吓個心？哈哈，講笑啫！

低潮多過高潮

吳：有人真係以為我係醫生，我幫內地一個醫院做代言人，老闆話真係有人打嚟搵「程至美」呢個人，證明角色好深入民心。

其實我做咗奸角都好多年，一路都唔開心，咁多年嚟，我覺得自己低潮多過高潮，成日都要為錢而做，好似嗰次喺台灣拍《俠義見青天》，要強姦曾華倩，唉，要我做啲咁嘅嘢。當時搵我拍嗰個導演，原本話唔係奸角，到我化妝嗰刻畀個劇本我，先知要強姦華倩，我同導演講唔拍要走，佢死話好趕，唔知點解我成日都遇到呢啲嘢。

曾：你之前咁易應承人？

吳：我同呢個導演成組人合作電影《跛豪》時好開心，之後佢同我講，話要拍套浪漫愛情片，嘩，我梗係制啦，點知嗰套係《肉蒲團》，我話唔拍啲咁嘅嘢，就即刻畀人兇：「唔拍咪賠二千萬囉！」

曾：我都唔知呢啲背後嘢，我同你拍《俠》劇時，只係知唔開心。

吳：我睇戲好投入，好似睇偶像發仔啲戲，我都好憎成日害佢嗰個「四眼仔」，佢叫乜名我唔知亦唔使知，總之影迷個心態就係咁，依家情況換喺我身上，要我做嗰個「四眼仔」，我梗係唔開心啦！我以前冇用心做嘅（奸角），仲試過畀啲貨車佬用粗口鬧。不過，依家就唔同，張家輝做奸角都攞七料影帝啦！

唔認有少爺脾氣

已定居北京的吳啟華認真有心，應承老同學曾華倩做訪問，當日特別坐飛機來港，令華倩相當感動，難怪訪問時華倩坦言對啟華的軼事印象深刻，但其實源自其少爺脾氣引發的兩宗罪。

華倩說：「當年你戴隱形眼鏡，點知跌咗一隻，叫我哋幫手搵，點搵啫！話明係隱形，梗係搵唔到，你跟住發脾氣唔上堂走咗！第二日返嚟先話畀我哋知，原來眼鏡攝咗喺眼球上面。另一件事，有次我哋（包括娥姐）搭巴士過海，你話要搭的士，咁貴梗係唔搭啦，咁你就一路哦，點知去到駱克道就自己按鐘要落車，我哋都愕然，所以你有個綽號叫『駱克道停一停』！」

華倩說來氣沖沖，但淡定的啟華笑問：「你咁講想表達我脾氣差？我年輕時係幾差，不過，唔係你哋講嘅少爺脾氣，我喺英國讀書都捱得好辛苦，成日畀人蝦，絕對唔係你哋諗嘅『番書仔』！」

文：影視組

攝：黃叔榮

場地：the mira HONGKONG