樂隊Rubberband（RB）與師弟鄒文正前晚齊齊演出酒吧騷，最近忙於籌備音樂會及新碟，希望多出活動搵真銀，不怕遇上醉酒觀眾的泥鯭笑說：「飲大咗嗰個係我，騷前都會飲少少酒放鬆。」各人即互爆飲醉瘀事，阿偉說：「係呀，泥鯭放鬆到連鼓棍都飛埋出嚟！」問到RB當中誰酒量最淺，泥鯭就透露6號飲半罐啤酒即醉，他說：「試過倒數活動之前6號飲咗少少，點知表演嗰陣有半首歌歌詞都唔記得，仲畀Joey Tang怒睥。」
