Yumi玩失蹤無限期冰鮮
之前只顧瘟仔得公司放生的尹蓁晞（Yumi）沒有珍惜機會，她原有份演出鄧特希監製的亞視處境劇《親密損友》，但Yumi兩次角色試造型都玩失蹤，鄧一怒之下決定換角，Yumi經理人公司有感她失場兼影響公司聲譽而將之封殺，除無限期雪藏外，將保留法律追究權利。
Yumi憑33C巨咪及甜美樣貌，在寫真集及Cosplay巿場上可說長做長有，而經理人公司為開拓她其他市場，最近成功傾成參演鄧特希監製的亞視處境劇《親密損友》，當中Yumi演出一個說廣東話不正的角色，並與師姐趙碩之、關楚耀合作。
趙彤頂上
惟Yumi爛玩性格不改，兩次《親》試造型均沒有出現，失場後連相關的宣傳活動都可以遲半日才現身，經理人公司向監製解釋有時完全聯絡不上她，鄧氏怕劇集受影響索性易角，現改由趙彤接演。由台灣來港的女主播趙彤早前與霍啟剛傳緋聞後廣為人認識，相信再演港劇可助她的人氣。
由於Yumi愛玩失蹤，影響經理人公司「大名娛樂」聲譽兼蒙受損失，據知「大名娛樂」考慮採取法律行動。
隨時被告
記者就此事向Yumi經理人戴夢夢了解，她昨承認Yumi早前與她們在美國登台後便失蹤，有關拍劇失場一事，公司已將她雪藏，至於法律行動則正與老闆商討中，戴說：「Yumi十二月已經去咗美國，新年期間我哋去嗰邊登台都有預佢，但之後佢又唔見咗，我哋都搵佢唔到，只係Yumi打番嚟，或用電郵聯絡，佢今次甩底，公司都好唔滿意，佢成日用身體不適為由唔出現，（掛住拍拖？）係做嘢嘅，睇有冇心啫。」至於鄧特希昨日亦承認Yumi角色被換掉，而改由趙彤演出，鄧說：「起初都擔心Yumi年紀太細，依家換趙彤，覺得仲適合。」
文：影視組