蔡楓華：名譽地位要一手攞番
蔡楓華（Ken）闊別十一年再踏舞台開演唱會，個唱開賣即告爆場，之前被嘲「四大癲王」今次開騷要成功洗底兼「鹹魚翻生」，Ken要向天下公告會親手將失去多年的「名譽和地位」一鋪攞番晒嚟。
蔡楓華：蔡 記者：記
事業篇：信心爆棚 從冇台上失常
近十年來，Ken事業可說一潭死水，等待十一年終於守得雲開，三月廿六及廿七日在九展開演唱會，為個唱積極節食及瘦身以最佳狀態示人，對能重生出發，Ken今次只許成功不許失敗。
記：你覺得買飛入場觀眾抱甚麼心態？
蔡：咁多年來，有好多Die Hard Fans，亦有好多人聽我嘅歌，買我嘅碟，係普羅大眾，前幾日搭的士，的士司機知我開演唱會，都戥我開心，話會捧我場。可能我隔咗好多年冇開騷，震撼性好高，自己都始料不及，人氣返晒嚟！
記：多年未開個唱，可擔心忘記歌詞？
蔡：唔會，以前啲歌都記得晒，不過，今次我想有新唱法。
記：搵老師學？
蔡：唔會，我會自己研究，慢歌一定冇問題，快歌要跳舞就難啲，因為我係「舞林敗類」，但公司話會畀Dancer我，同我嘅台風配合。
記：希望藉今次演唱會攞番啲乜？
蔡：我要攞番失去嘅名譽同地位，失去咗好多年，我要一手攞番嚟，希望做埋今次演唱會，我可以開世界巡迴演唱會，去內地、美加、澳紐咁巡迴。
記：驚唔驚演唱會只係一個泡沫，一瞬即逝？
蔡：唔會，只要有人line-up我去做嘢就冇問題。
記：身心Ready好未？
蔡：我覺得反而要處理點樣收拾心情去突破自己。
記：怕唔怕有啲觀眾入場係想睇你失常？
蔡：從來我由十幾歲開始唱歌到今日，從未喺台上失常過，邊次有吖？無論喺香港、內地、美國都未試過。謠言止於智者，大家嚟睇我演唱會啦，我好有信心做好。
記：原本三月廿六日一場，依家演唱會再加開一場？
蔡：我知依家好多演唱會都係夾幾間主辦單位同贊助商先開到，但我呢個演唱會係冇贊助商架，真係一張一張賣出去，有咁嘅成績，唔係我誇口自己好，係成隊Term嘅成果，我有信心第二場都爆埋。
記：有冇諗過演唱會之後？
蔡：我會出新碟同出書，我除咗係歌手，仲係一個文人，寫嘢難唔到我，會寫幾十年嚟娛樂圈嘅事同經歷，完咗演唱會就會埋首寫。
家人篇：報答親恩 唔會出賣自己
Ken過去多年一直零工作，沒收入的生活，幸好一直有80高齡的母親不離不棄照顧，今次有重生機會再踏舞台，Ken最希望在未來日子能一盡孝道報答母親，與家人關係修好。
記：80高齡嘅媽媽，點睇你重返舞台開演唱會？
蔡：媽咪好開心，佢講句希望我藉呢次好好平步青雲。唔只媽咪，有好多朋友都支持自己，希望蔡楓華好嘅唔只一、兩個，仲有好多人。
記：媽媽仲有冇特別說話同你講？
蔡：媽咪話：「衰仔賺多啲錢，買番層樓，娶老婆成家立室！」
記：覺得虧欠媽媽好多？
蔡：佢知我發生乜事，佢冇怪過我！我最好報答媽咪係自己要爭氣，演唱會除咗媽咪要到，我想我哥哥、姐姐都嚟睇我，以往我哋關係好疏離，係少機會聯絡。
記：幾年來經濟狀況如何？
蔡：過去唔會再講，望前面啦，經濟會好好嘅。
記：開完演唱會，財政變好，怕唔怕以前幫過你嘅人向你追債？
蔡：從來我冇借過人錢，收入都係自己賺番嚟！
記：男人要講骨氣？
蔡：唔係骨氣可以形容，係堅強，當自己被冷落，我同自己講終有一日會出頭。有人叫過我賺啲可恥嘅收人，但我都冇去做。
記：可恥收入係乜？
蔡：過咗去唔講，總之維持到生計，點會去做，只有人欠我錢，我冇欠人錢，欠人情就有，好似今次Money（盧敏儀）呢個咁大人情，都唔知點還。
友情、愛情篇：阿梅哥哥丹尼交心
過去的「瘋癲歲月」令Ken讓人有生人勿近感覺，慶幸還有好友盧敏儀義無反顧相助，Ken回望當年能交心的三位圈中好友已經離他而去，而愛情方面Ken自嘲曾經「好吃香」。
記：以前歌手競爭激烈，導致你歌手朋友不多？
蔡：係，以前喺唱片公司除咗我一個男歌手，其他就係林憶蓮、林志美同甄妮，唔似Big Four佢哋呢，講以前交到心，都係阿梅（梅艷芳）、陳百強同張國榮，我唔係要叨光，大家係一齊玩、一齊落Disco跳舞，依家三個都唔喺度，真係邊估得到。
記：演唱會唱佢三位歌手嘅歌？
蔡：可能會揀Danny仔（陳百強）嘅歌，佢有首《鼓舞》，歌詞頭兩句「為甚要受苦痛的煎熬，快快走上歡笑的跑道」，係好感動，好啱自己。
記：以前拍拖有冇試過接近結婚？
蔡：以前我環境同條件好時，有一個新加坡數一數二嘅富千金女友，我同佢唔係性格不合，而係我哋生活條件實在有太大差異，當年佢嚟香港，我已經帶佢去高級餐廳食飯消遣，但佢都唔滿意，要包場清晒所有人，你話我哋點可以繼續呢！
記：會唔會搵番佢？
蔡：唔會囉，人哋都嫁咗人啦，冇可能。
採訪：音樂組
攝影：沈健程
場地：南灣海景酒店