李彩華笑林峯不嬲都chok
曾與林峯有過一段情的李彩華（Rain），被記者重提舊事時不但沒有避忌，還大方稱讚對方愈來愈英俊，不過就笑言從前的林峯已有「chok樣」，多年來都沒有變！
昨日李彩華出席朱潔儀推出的時裝品牌DONNA CHU STUDIO發布活動，透露情人節與父母到泰國旅行，元宵則與女友人度過，陰盛陽衰，慨嘆感情生活吃白果。談到早前林峯被問及與她分手後再沒拍拖時表示很驚慌不懂回答？Rain聽罷即笑說：「係咩？我驚啲喎，我唔知佢咁講，亦唔知呢件事，（有冇機會復合？）唔知，唔識答呢啲問題；其實我哋好少合作，對上一次已經係六年前，不過喺大場合見到都會打招呼。」
愈來愈靚仔
記者笑問Rain可有覺得林峯比從前英俊？她即稱讚說：「佢不嬲都靚仔o架啦，依家仲愈嚟愈靚仔，見到佢今日喺樂壇嘅成績都好戥佢開心，因為佢以前都提過想唱歌出碟。」記者問她可有覺得「走寶」？她表示感情事不可看回頭，又指當時二人都年少，時間不對，但就認為對方是個好人；問到若對方重新追求會如何？Rain說：「諗諗先，咁耐冇見過都要了解吓先，以後嘅嘢大家都唔知，（佢以前有冇chok樣？）都chok chok哋o架，咁耐都冇變。」
此外，同場的陳彥行就透露有意投資七位數字開雲南菜食店，又計劃推出自家護膚品牌，不過由於租金太昂貴，所以若成事也只會在網上售賣或開專櫃而已。
文：名人組