43歲周慧敏不倒傳說

人生有幾多個十年？被封做「玉女掌門人」的周慧敏（Vivian），踏入娛樂圈第廿五個年頭，曾經有感迷失的她，一度暫別娛圈六年，03年重新出發，歌迷對她熱情未減，43歲「玉女」至今仍屹立不倒。Vivian坦言不會再像從前拚搏，只會為興趣而工作。

拚搏的日子，令周慧敏一度迷失自我。

今年係我入行25周年，25年！一個人大學都畢業，係幾難以想像，唔係咁易，由86年入行，25年後仲係藝人身份，雖然唔係活躍，但我都冇諗到，當初畀我估，以為自己會回歸平淡做番普通人，更加諗唔到下個月仲可以開個人演唱會。

作為藝人好多範疇我都做過，始終歌手身份畀人最深印象，令到好多華人認識自己，呢25年來的支持，對粉絲、對自己都係一個考驗，趁呢個機會，仲有氣力、心態又得，咪舉行一個紀念演唱會，將來會唔會再開騷？真係唔知。

放大圖片

重整心態

雖然話女人對年紀好敏感，但我冇擔心過，今年43歲，反而喺29歲踏入30歲時，有「叮」一下怪怪的感覺，覺得係一個新階段，在圈中做了十年，由一個細路女到大個咗，感覺好唔同，發覺自身要求都唔同晒，突然覺得要重整心態，啱啱合約又屆滿，阿Joe（倪震）又決定移民，我畀埋自己一個break放長假，在97年左右跟阿Joe到加拿大旅居，直至03年才回歸香港。

旅居的日子我想過普通人的生活，因為覺得以前框喺小圈子裏，在演藝生活裏，自己好似一副機器，只係不停去做，但就好迷失，忽略了家庭，社會知識都冇，覺得要重新學習照顧自己，咁大個人先識，你話驚唔驚？機緣安排下去了加拿大，係自己的福氣，亦係一生一個轉捩點，畀我做回普通人，重新了解自己需要，認清能力，搵到一個生活方式，識得愛錫自己同去愛人，慢慢建立番自信。

放大圖片

發掘潛藏

暫別6年後再戰娛圈，但心態上已經唔同，以前可以話係作戰狀態，為追求理想而奮鬥，但難得仲可以做回藝人身份，我希望為社會、支持我的粉絲做一些建設性工作，將來會唔會唱到老？我冇刻意去計劃，抱隨緣態度比較好，除了演藝工作，我會嘗試畀空間自己，將潛藏能力發掘，一定會繼續工作，因為工作係社會溝通的一個渠道，我會增值自我，調節能力，與時並進，我唔當自己係前線的藝人，唔會再好似以前咁拚搏，我會為興趣工作，覺得好輕鬆。

「原來結婚係好正」

愛情路上，Vivian跟阿Joe這對「金童玉女」，相知相愛逾廿年，縱使離離合合，飽受嚴峻的考驗，但無阻兩人堅毅不摧的廿年情……

阿Joe對我影響好深，由89年相識，到大家一齊成長，佢在我生命中佔了一半時間，除咗係我老公，仲係我的知己好友，以前我哋的確冇結婚概念，兩人都相處了咁多年，我同阿Joe都好獨立，有時好享受一個人的時候，既然咁舒服，覺得結婚都冇乜大分別，但結咗婚先知係有分別，以前一個人，依家乜都要同人share，同Husband好似合體，全部都係一條數計，好難分到「你」、「我」，有時我做了一個決定，我覺得咁似佢嘅，原來不知不覺間我哋互相吸收對方啲嘢，互補不足，真係好奇妙，相識了廿幾年，在對方眼中會睇到有自己。

經歷考驗

我同阿Joe識於微時，大家由乜都冇，到建立了自己的工作、經濟基礎，廿年來經歷過唔少，一段感情經歷過考驗係好事，先知搵個相愛係好易，但要搵到個互相適合、可共同生活，其實係好難，兩人的愛唔係最緊要，最重要係承擔，有能力為對方作出承擔、調節，大家的感情也愈來愈深厚，甚至昇華了，在那一刻大家想到結婚，好想成為夫婦就決定結婚了，原來結婚係好正。