徐濠縈Eason分頭搵食
徐濠縈（阿徐）前晚出席時裝品牌活動表示情人節零驚喜，雖然她獲老公Eason（陳奕迅）送上吊墜作情人節禮物，又有經理人陳家瑛贈魚翅做晚餐，但兩公婆未有撐枱腳，反而各自「搵食」！
阿徐前晚出席「CABANE de ZUCCa 2011春夏時裝展」，雖然她比大會邀請時間遲到廿分鐘，穿上裸色百褶長裙的她甫到場即成為焦點，同場包括年屆六十歲的品牌設計師小野塚秋良，原來今季系列是對方為品牌設計的最後告別作，將退休享受人生，難怪阿徐見到大師即拉着一起合照。
教女做功課
前晚是中國元宵佳節，阿徐單拖睇騷，原來即使是西方情人節都未見驚喜，她笑說：「犀利喇！其實我嗰日有喺iPhone一個app入面post相，但得圍內幾個朋友見到，嗰晚個節目係影住我同個女做功課，幫佢溫書。（Eason點解冇畀驚喜？）冇驚喜就係驚喜！但我要留喺屋企，朋友都笑我好似重讀小一。」原來當晚Eason經理人陳家瑛專程炮製魚翅和秘製餃子，待Eason一家三口在家中享用，估不到結果是各自各進食，她說：「囡囡食六點幾，我食八點幾，Eason就唔知食幾點。」
撞到先送禮
阿徐表示結婚多年不會感到冇癮，而Eason亦有送上吊墜作情人節禮物，問到是否鑽石？她說：「唔係鑽石，仲要早兩日送畀我，因為嗰日我喺停車場撞到佢，見佢拎住個袋，之後佢話畀我發現咗，咁咪送畀我先。（咁你送咩畀佢？）冇呀，就係教好囡囡囉！」
至於今次品牌系列主題名為在巴黎的最後探戈舞，設計師小野塚秋良表示退休後將享受人生去旅行，而一手創立的品牌會由幕後班底繼續運作，本地設計師郭慶彬亦有到場睇騷。
文：專案組