何韻詩帶傷送暖柬埔寨
何韻詩與DJ Donald（唐劍康）早前以本年度「饑饉之星」身份隨宣明會遠赴柬埔寨探訪，在五日四夜行程中，兩人探訪多個貧困地區，眼看貧富懸殊，還有得到幫助的居民如何生活，令他們感受良多。
早前阿詩與「探訪初哥」Donald遠赴柬埔寨探訪生活困苦的居民，他們首次與領養的小朋友見面，阿詩說：「我哋去好偏遠嘅地區，路途好崎嶇，自己之前扭傷腰，每個鐘我都要做瑜伽、拉筋，希望將當地情況話畀大家知，鼓勵更多人參加，佢哋係窮到衫都冇得着，知我哋去拍攝，特登問人借衫。」
Donald感慨良多
首次參與探訪的Donald曾為搞笑男子組合I Love You Boyz（艾粒）成員，他透露從前因形象調皮與「探訪」無緣，這次旅程可謂感觸良多，他說：「係真o架！因為艾粒嘅作風，所以冇機會去探訪，今次體會好深，見到當地人生活艱難，個心好酸，自己仲帶咗好多嘢去派畀小朋友，宣明會嘅主旨係助人自助，幫佢哋改善生活。」
提到最深刻的畫面，阿詩與Donald表示見到繁榮巿區與環境惡劣貧民區只是一街之隔的感受最深，Donald說：「貧民區嘅小朋友係畀命運玩弄咗兩次，本身生活困苦，以為到巿區可改善，點知更慘，見到佢哋受城市思想影響，生存意識好唔同，冇父母保護下，佢哋唔似貧困地區嘅小朋友見到陌生人會驚，怕畀人拐帶，派嘢時候會嚟搶。」
為飢餓孩子打氣
曾跟貧民區街童中心的小朋友交流，阿詩說：「有小朋友話多謝我哋冇嫌棄佢哋，其實好想佢哋知道，佢哋唔係低一等，喺行程中我真心問咗一個問題，好想知佢哋發夢會見到咩，佢哋每日嘅生活就係不停搵嘢食，腦中仲可以有啲咩呢？」本年「饑饉」將於四月十六日及十七日舉行，除有以往的三十小時饑饉營，更新增八小時體驗營，讓更多人有機會參加，為飢餓孩子打氣。
文：音樂組