蔡楓華high到喊坐男粉絲大髀
全面復出的蔡楓華前晚high爆《勁歌金曲》，唱到將咪stand fing完再踢，繼而落台坐男粉絲大髀，大搶青春偶像江若琳鏡。
蔡楓華前晚與組合C AllStar、江若琳及泳兒等出席《勁歌金曲》錄影，以中山裝戴帽示人的蔡楓華狀態甚弗，踏入錄影廠獲不少fans歡呼打氣，更有人大讚他靚仔，得到粉絲熱捧，冧得蔡楓華快歌、慢歌唱勻，並於台上大冧粉絲：「幾十年冇見你哋，終於有番啲粉絲出嚟，好感動。」
落台寒暄收禮
及至唱完一首慢歌，蔡楓華懶理隨後上台表演的江若琳，自顧走去粉絲堆寒暄兼收禮物，大搶風頭。一直high爆的蔡楓華突然匿在一角用紙巾抹眼淚。其後蔡楓華走去粉絲堆，無厘頭地坐在一名男粉絲大髀合照。
演唱會加一場
當蔡楓華唱快歌《風中追風》時情緒high到爆，將咪stand fing完又踢，台風十足，只可惜稍為甩嘴，蔡楓華受訪說：「唔緊張，都好開心，上到舞台就好開心，（演唱會請誰任嘉賓？）好似話阿倫哥嚟，睇吓邊個義薄雲天囉！」錄影完畢由盧敏儀送返錦田寓所，盧敏儀透露蔡楓華一度落淚因為知道演唱會頭場售罄，現會加開一場。
另外，蔡楓華昨晚又再出動，在盧敏儀夫婦陪同下現身尖沙咀，會合黃柏高飯聚，期間四人言談甚歡，不時碰杯，期間蔡楓華面對記者，亦一改以往狂躁性格，面向鏡頭任影唔嬲。
文：影視組