許冠文爆粗 阿女嗌收檔
許冠文（Michael，米高）前晚於紅館舉行棟篤笑，論盡時事大事，愈講愈「有貨」，超出預算差不多45分鐘，要女兒上台提場「立即收檔」才不致罰錢收場。
米高事隔五年再度開騷，除了太太、女兒許思行、弟弟許冠英、許冠傑的兒子到場外，還吸引了林海峰、黃子華、陳國強、林敏驄等撐場，女兒更變身助手為他抹汗更衣，孫仔孫女上台獻花，大晒溫情！適逢前晚其妻生日，他在台上獻唱生日歌又大膽「踢爆」老婆有「何鴻燊現象」：「打開眼唔記得自己尋日講過乜，好熱情，以為自己係靚女！」
典床晒「鎯鎯」
米高又分享入行「血淚史」，因搞笑形象深入民心，歌手、司儀、主持樣樣做不成，當中包括床上戲，他即場晒演技在布景床上左典右典，扮被導演指導晒「鎯鎯」！之後又鬧爆「菲律賓事件」，力斥菲總統為粵語長片內的奸人石堅，又扮報道新聞暗示富豪搵代母生三胞胎：「約代母去九龍塘，三分鐘就得啦！」他又論盡政府官員及政治人物、包致金姪女襲警等等，米高說做人最緊要識做戲：「你有冇見過影帝離婚？周潤發離婚時都未做影帝，嗰陣仲係票房毒藥。」
孫仔唔識聽粗口
其後在慶功宴上米高透露是次演出不問酬勞，扣除成本全數捐予行善，他說：「以前都有講過，拍拖嗰陣當咗老婆隻錶，之後每年生日我都會送隻錶畀佢，後尾佢話唔好再送錶畀我喇，不如你做個騷我睇仲好。」在騷中不時將太太擺上枱作笑點，米高說：「唔可以講第二個女人嘅名o架嘛，有啲都唔係佢，但佢都慣咗硬食喇，相信子華同林海峰都一樣。」
提到有孫仔孫女在場仍在騷上爆粗，米高說：「佢哋未識聽，都唔算粗口，son of the bxxxx解母狗的兒子啫，其他都係好斯文，同子華嗰啲差得遠，就住就唔好笑。」至於會否考慮與子華及林海峰合作，他說：「合作係可以，不過國際規例棟篤笑係一個人，係好主觀嘅嘢，如果預先夾定就冇癮。」
文：音樂組