劉璇心中富有自爆師情

劉璇加盟Neway唱片公司後，預計於二月底推出國語新碟，對感情一向低調的她，坦言早已有一位相戀多年的北京男友，但詳情不願多透露，只肯說：「我哋拍咗拖好多年，佢係老師。（係咪富二代？）咩係富二代？只可以講佢好有才華，心中富有。（係咪靚仔？）OK啦。」

回京蜜會

不過因劉璇經常穿州過省工作，故大家相處時間不太多，但她返北京時就一定會見面。談及郭晶晶退役後將繼續升學，劉璇大讚晶晶好學，又指：「呢個係大部分退役運動員都會做嘅事，因為我哋要不斷增值自己，我退役後都有喺北京攻讀新聞系。」

珍惜親情

劉璇農曆新年返家鄉湖南和家人團聚，她如此重視和家人的相處，全因由九歲加入國家隊接受訓練至廿一歲退役，有十二年時間都一直沒有機會返湖南過年，她說：「所以我一直好珍惜同家人相處嘅時間。」問劉璇當時可覺得苦？她直言有此感覺，但無奈做運動員就要依照國家的指示，不過她的教練很錫她們，會帶他們一班小運動員返家食團年飯，感受過年的歡樂氣氛，她謂：「我同其他運動員會玩氣球，因為唔可以放煙花，所以我哋用氣球代替。」採訪：音樂組

衫：Miss Sixty

髮型：Wing Wong (Orient 4.com.hk)

Makeup：Annie.G. Chan