蔡楓華：畀多次機會我
蔡楓華相隔十一年將於下月廿六日舉行演唱會，修身成功的他昨日西裝骨骨戴上黑超出席記者會，負面新聞不絕的蔡楓華希望外界給他機會，他說：「蔡楓華冇事，會重新出發！」
蔡楓華（Ken）日前獲好友盧敏儀圓心願，將於下月廿六日假Star Hall舉行一場「全心支持蔡楓華演唱會」，昨日Ken以個唱海報造型全黑打扮出席記者會，吸引林利及半百傳媒採訪，林利說：「佢係一個男人嚟，過去十年嘅新聞都係負面，真係唔容易，佢能屈能伸。」而主辦單位之一兼盧敏儀老公孫敬安指Ken過去十年從沒問人借錢及搶錢，他說：「我以前都曳過，依家仲企喺度，相信Ken都可以。」
目標再減十磅
Ken在歌曲《愛不是遊戲》伴奏下出場，先與傳媒及主辦單位打招呼，接住便說：「希望大家畀多次機會蔡楓華，蔡楓華會重新出發。」Ken受訪全程有紋有路，他表示開騷沒有壓力：「平常心，如果反應好，人哋睇得起先加場。」成功減肥的Ken說：「要再減多十磅。」問到一直照顧他的母親會否睇騷？他說：「會嚟，呢個世界最珍貴係親情，尤其係媽咪。」
出自傳訴辛酸
被傳精神有異的Ken兩度叫大家放心，他說：「蔡楓華非常好，冇事，我要澄清一樣嘢，我開騷唔係醫眼，係報答歌迷。」聲稱被打傷導致大細眼的Ken說：「依家仲要覆診，好小事，做個手術就搞掂。（手術費好貴？）有老闆支持冇問題，稍後會出書剖白過去十多年的痛苦經歷。」
記者會後，Ken與盧敏儀乘的士到隔籬街會合江若琳及組合C AllStar為今晚的《勁歌金曲》錄影綵排，逗留近一小時，心情靚爆的Ken徒步返回記者會場地，再乘坐盧敏儀座駕到電視台受訪及食飯醫肚。
文：音樂組