Ana R.主動求愛嚇走相睇男
情人節將至，單身的混血模特兒Ana R.揚言今年要主動出擊，不排除會「相睇」找對象；與男友甜蜜蜜的諸葛梓岐則大晒幸福，笑言和男友每天都是情人節！
昨日Ana R.和「新Canon女」Melanie Z.一同為手袋活動擔任模特兒，其中Ana甫見記者即以廣東話說「恭喜發財」，又謂過了一個開心的新年。至於情人節如何慶祝？她說：「仲未有人問津，不過情人節應該會同師妹Jessica C.一起過，（佢男友呢？）佢男友會返香港，所以大家會一齊食飯慶祝，（會唔會酸溜溜？）有少少羨慕，但就唔會妒忌，我現階段都好開心！」她又坦言兔年會主動出擊找男友：「之前太忙好多嘢做，都冇時間同人約會，不過今年就會抽多啲時間約會，（會唔會相睇？）都會架，其實之前都試過一次，不過嚇到個男仔心臟病發，因為佢見到我又高又靚。」
Melanie成功置業
同場的Melanie就自爆剛以五百萬購入薄扶林一個七百呎的單位，兩周後會拿鎖匙，但非結婚愛巢，自己亦不急於結婚。
另一邊廂，模特兒諸葛梓岐（Marie）與男友薛嘉麟向來甜蜜蜜，但Marie卻坦言未有慶祝情人節大計，更肉麻地說：「我哋日日都係情人節，所以無乜諗嗰日要點慶祝。」禮物方面，Marie稱仍未買到合心水禮物，她笑謂：「我個人比較環保，想買啲實用嘅嘢，或者整個朱古力心，食咗咪算，又夠甜。（你自己想收乜？）食餐飯開心就得，或者送支靚紅酒畀我都得。」
難忘氣球飄滿屋
Marie又稱曾在情人節收過數十個氣球，飄滿整間屋，令她十分驚喜。而日前Marie獨個兒在又一城購物，見她主攻男裝，連入數間男裝店，似乎為男友選購情人節禮物，但可惜當時正值減價期，Marie未有揀到任何合適禮物，最後空手而回。
文：名人組