諸葛梓岐：我冇公主病

「唔會睇唔起人」

各位好，我係諸葛梓岐，英文名Marie，大家可能會叫我諸葛公主。入行至今兩年幾三年，有過唔少負面報道，當中最多網友提起嘅一定係我嘅金句同公主病呢兩件事。好多人都問我點睇，其實我真係唔介意，入咗行之後，人哋鍾意講乜就講乜，總之我做好自己，自己唔好將件事放大，公主病好濕碎啫﹗

不過，我要強調，我係冇病架！我好健康。我只係做人有要求，呢個並唔係壞事。好似食嘢咁，我唔會乜都食，會有自己嘅選擇。總之我對人唔差，對朋友仲好好添。我唔會亂發脾氣，亦唔會睇唔起人。

「對住傳媒標汗」

不過老實講，我依家講嘢真係會小心好多，有時對住傳媒真係會標汗o架！哈哈，因為我平時連做運動都好少出汗。當記者問我嘢，我左腦好想講出嚟，但右腦就會叫我唔好講。你知啦，我個人向來好率直，有嗰句講嗰句，所以真係好辛苦。最難就係為咗要顧全大局，有時明明知道內情，但都唔可以解釋。可能我真係唔識同傳媒應對啦。

對我嚟講，好多新聞都好無辜！好似之前陳法拉事件咁（被指踢爆陳法拉結婚），我真係乜都冇講過，只係有記者同我講陳法拉結咗婚，我就話恭喜佢，無端端變咗係我爆料。仲有之前話我同男友分手，其實我只係話覺得工作同愛情好難兼顧，我係有感而發，想同大家分享吓感受，並唔係同男友分手，但寫出嚟就變咗另一回事。

我覺得入行前後最大分別，就係以前我嘅世界只有黑同白，係冇灰色。以前同人講嘢唔會擔心，唔會驚，屋企人由細到大都教我要用個心去對人，點樣諗就點樣講，但咁就出事啦﹗如果你問我係咪有嘢想平反，答案係冇嘅！喺娛樂圈，如果要平反，就係自己攞嚟衰，所有事咪當娛樂吓人，自己笑吓咪算囉，冇乜所謂，最重要係身邊人知道自己係點樣嘅人就OK。

諸葛梓岐與男友薛嘉麟感情穩定，拉埋天窗指日可待。

陳法拉經常與諸葛梓岐傳是非。

「拍拖從冇爭執」

提起身邊人，咁當然包括我男友（Neway二太子薛嘉麟）。我同佢拍拖兩年幾，大家相處得好開心。我覺得相處之道最重要係大家講道理同互相支持，佢對我嘅工作係好支持，同畀絕對自由。

可能大家以為我係屬於小鳥依人嘅女朋友類型，但其實唔係，我外表女仔，但性格男仔頭，我對拍拖好理性，唔會感情用事，鍾意講道理，只會對事不對人。我亦唔需要男朋友絕對遷就，大家互相遷就先公平，而且每個人都有脾氣，如果男友就晒我，咁我又會覺得佢冇自己性格。我哋拍拖咁耐，從來都冇任何爭執，就算之前佢畀人影到上遊艇，有個o靚模主動黐埋去，我都只係笑佢畀人抽水，因為我對佢非常信任。

我同男友只係好正常咁拍拖，生日禮物或者佢突然嚟探我班都會有，但唔會話好誇張感動到喊。我哋真係冇乜高低起伏或者火花，係細水長流嗰種。之前有傳媒問我幾時結婚，其實我唔會將結婚睇到好大，我覺得結婚同拍拖嘅分別只係欠張紙，我喜歡自由啲。

其實諸葛梓岐不慣性感示人，為了工作才勉為其難。

家境富裕的諸葛公主經常被拍得到名店購物。

一定唔搵代母

當然我哋係有傾過結婚，但完全冇諗過點搞，未有任何實質計劃，亦唔會係短期內發生嘅事，因為太多工作安排咗，可能最快都過咗聖誕。不過我可以肯定咁講，婚後我一定會繼續做嘢，可能工作性質會有啲唔同。我亦都一定會生小朋友，生兩個，最好生龍鳳胎一次過搞掂，如果利用人工受孕方法可以生龍鳳胎，我都唔會介意，最重要係唔會影響BB健康，但我一定唔會搵代母，我會自己生。

自認怕死 想做醫生

唔知大家估唔估到我小時候嘅志願係咩呢﹖做公主？梗係唔啱啦！我細個想做醫生，因為覺得醫生好厲害，醫生係唔會生病嘅（當然長大後知道唔係），因為我好怕死。不過人大咗就有好多變化，好多事都意想不到。我入行做模特兒都只係出於巧合，當時有個阿姨問我有冇興趣做兼職模特兒，佢話工作簡單，老咗又可以睇番啲相做紀念，我就答應咗。

我對任何事都唔會計劃太多，覺得人自有命數，我相信前世今生，好多事唔需要強求，係你就係你。我冇諗下一步係點，總之有機會就去嘗試。

文：名人組

場地：Xenter

服裝：KOOKAI