林欣彤秋官瞄實騰晒雞
汪明荃（阿姐）、鄭少秋（秋官）及日本音樂家喜多郎前晚錄影節目《明秋喜相逢》，邀得林欣彤、官恩娜及組合糖兄妹多位樂壇後輩參與，林欣彤（Mag）有幸與阿姐及秋官合唱經典歌曲，綵排時被秋官望到實，嚇得她大呼緊張！
林欣彤與前輩阿姐及秋官合唱《千王群英會》時表現穩定，不失大將之風。問她可會緊張？Mag即表示：「啱啱綵排時見到秋官喺下面望住我即刻好緊張！（佢哋演唱會有冇搵你做嘉賓？）冇呀，不過如果有我會有壓力，但一定好開心！」出道不久的Mag得到公司提攜，不過未見自滿更謙虛表示：「真係覺得好幸運，公司畀咁多機會我，（太快上位？）都唔會嘅，我要靠前輩同埋工作人員提點，都係由低學起。」
停學攻娛圈
Mag有份參演的賀歲片《我愛HK開心萬歲》票房大收，她亦大感雀躍的透露：「所以我聽日（昨日）會去慶功。」將於六月考畢業試的她表示未肯定會否繼續升學：「如果有心，過幾年都可以繼續讀。（畢業後簽英皇？）呢個暫時都未知！」
阿姐要撲飛
首次與日本音樂家喜多郎合作的阿姐與秋官均對對方讚不絕口，阿姐笑言：「我冇諗過有機會同佢合作，佢藝術啲，我同秋官就大眾化啲，所以要佢就吓我哋囉！」演唱會舉行在即，阿姐笑言正收「親朋戚友」的訂飛Order，問到會否加場？阿姐表示：「未知呀，都要睇情況。」
文：影視組