李彩華人仔化歐元意大利血拼
李彩華（Rain）近年經常返內地掘金，豬籠入水，正所謂「辛苦賺錢旨在使」，Rain絕不待薄自己，早前便豪花六位數字歐遊歎世界，喪食喪買盡情玩，認真疏乎！
向來識飲識食的李彩華，近年常到內地登台狂賺人仔，荷包腫脹，成為圈中小富婆。早前難得放假，Rain便相約三五知己到意大利旅遊充電，她此行收穫甚豐，除品嘗地道美食，「血拼」才是此行主要目的，她掃勻各大名店，試鞋試衫又試袋，結果逼爆行李篋，名副其實「大出血」。
Rain說：「啲人以為我一年去幾次歐遊，其實我好耐冇去過，今次去意大利同朋友買嘢買到唔知時間，有次Shopping，人哋舖頭差唔多閂門我哋都未走，因為買嘢太多，結果要勞煩幾位壯男幫我哋搬戰利品上的士車尾箱，諗起都搞笑！」
唔識講 難溝通
七天旅程中，Rain暢遊羅馬及威尼斯等主要城市，參觀大教堂及許願池等名勝，令她目不暇給。問到可有艷遇？她說：「我哋成班女仔掛住食同買，冇艷遇啊！不過意大利男人好Man同有風度，可惜我唔識意大利話，好難溝通到。」Rain又擬定今年暢遊倫敦及巴黎的旅行大計，希望到時再掃盡名店！
蘑菇飯 必試！
Rain於意大利吃喝玩樂，她坦言吃的開支很貴，每餐動輒幾千港元，不過美食當前，幾貴都值得，她還極力推介意大利蘑菇飯、薄餅、芝士等，更難得是她食極唔肥，令人羨慕。
文：專案組