杜汶澤周旋靚女自認好命水
杜汶澤在新片周旋於張栢芝和熊黛林（Lynn）兩位靚女之間，當中更有一場色誘Lynn的戲份，阿澤背部全裸上陣可惜全部被剪，他笑說：「賀歲片唔係中秋，唔使逼大家賞月！」
阿澤有份參演《最強囍事》，並且艷福無邊，周旋在兩位美女栢芝和Lynn之間，他笑說：「我老婆都嬲，有乜理由我咁好命。」
他直言戲中最難忘是有場以背部全裸上陣、色誘Lynn的戲份，可惜最後都被全部刪剪，阿澤說：「佢事前一直以為大家同佢講笑，到真係埋位時，佢嚇到大嗌，完全做到導演要求嘅表情，我已經遮住前面，可能就係遮住咗先嚇親佢。（覺唔覺好可惜，觀眾都睇唔到？）可能要配合番內地嘅尺度，始終都係賀歲片，又唔係中秋，唔使逼大家賞月，雖然新年都可以『臀』圓，哈哈哈！」
今次已是阿澤第三度演栢芝的男朋友，大家甚有默契，對於影片票房已過千萬，阿澤信心十足的說：「呢個係栢芝復出第一炮，加埋『宇宙最強』甄子丹勁有喜劇細胞，部戲都好有吸引力。」
唔會生BB
新年有賀歲片推出特別喜氣洋洋，問阿澤老人家有否趁機催生BB？他認真地說：「我同老婆都有共識，唔會生啦！生就幾分鐘，養就幾十年，加上我阿哥已經生咗BB，完成咗歷史責任，總之我哋唔係抗拒，但都唔會刻意。」
文：影視組