阿倫認錯 哭謝身邊女人

已屆六十歲的譚詠麟(阿倫)半生周旋在正印楊潔薇(莎莉)和「紅顏知己」朱詠婷(Wendy)之間,盡享齊人之福,然而前晚阿倫在溫拿演唱會尾場上坦承自己「做錯事」,又哭謝「身邊的女人」,感激「她」替自己穩定大後方及內憂!

多年來傳媒對阿倫的正印莎莉、「紅顏知己」Wendy和兒子曉風的消息窮追猛打,但阿倫每次被追問時均大耍太極,務求對三位摯愛的傷害減至最低。前晚,一連六場《溫拿大躍進演唱會》圓滿結束,溫拿請來許冠文、草蜢和Mr.擔任嘉賓,演唱會唱至凌晨近十二時才結束,獲鄺美雲、溥儀眼鏡老闆邱子傑夫婦及陳曼娜等捧場,而鍾鎮濤(阿B)和女友范姜更親自迎接台灣尊勝第十二世嘉旺竹巴法王入場。

情憑誰能定錯對

在過去五場的互寸情史環節上,阿倫多次被阿B狂寸陷於正印莎莉及二房Wendy之間,前晚他破天荒首度公開答謝其「女人」,阿倫先是深呼吸兼閉目近半分鐘才開口說:「我要多謝一啲人,第一個係要多謝媽咪今晚嚟咗,第二個要多謝我身邊嘅女人!」全場即時屏息呼吸聽阿倫講話。

阿倫激動得邊灑下男兒淚邊說:「一直以來佢同我穩定大後方、穩定內憂,等我可以向前衝,你哋睇起上嚟佢哋好似好自由自在,但世俗始終係世俗,有世俗嘅眼光,呢啲眼光令到佢哋生活變得好難,空間好細,好希望傳媒朋友可以畀佢哋一啲空間,雖然話食得鹹魚抵得渴,但嗰個係我,做錯事係我,所以情呢樣嘢好難講,情憑誰能定錯對!」

強調歌酬五人分

慶功宴上,阿倫坦言自己是在一剎那有感而發,才會剖白對「身邊女人」的心聲,他坦言傳媒報道其兒子曉風已算畀面,問到曉風有否捧場?他說:「佢哋睇咗喇!」

至於何以突然那麼感性?阿倫說:「大家都咁多年!(講出嚟鬆口氣?)同佢哋鬆口氣囉,我喺兩邊都咁多年,感情一定深厚!」阿倫又再勸喻傳媒勿追訪其家人:「佢哋有自己尊嚴同感覺,唔好夾硬砌,我一向唔想,都唔係佢哋意願!」

雖然阿倫極力維護生命中三位最愛,但當問到自己一番說話是否代表兩房心聲?他即避忌表示:「我唔知,我講啫!有嘢搞我好喇,唔好搞佢哋,曾經試過喺街上亂追亂跑,我親自打電話畀有關人士,話有任何嘢發生一定私人追究,我講得出做得到!」此外,阿倫強調溫拿個唱一向是平分歌酬,亦否認吃穿山甲進補。

採訪:音樂組

想跟阿叻一同切磋賽馬心得,立即登記參加「靈活至叻爭霸戰」啦!