蔡楓華3月開騷盡地一煲

蔡楓華（Ken）當年因一句「一剎那光輝不代表永恒」，令事業跌落谷底，精神狀態亦變得飄忽，多年來沒人敢找他工作，結果絕迹娛樂圈。幸而，去年尾他獲邀上《勁歌金曲》重遇好友盧敏儀（Money），在Money幫助下，他終回歸樂壇開騷。

黑超look重現風采

本報在網上發現《全心支持蔡楓華演唱會》海報，戴黑超的他以西裝look上陣，以往的脹爆身形一掃而空，重現當年紅唇王子的瀟灑風采。記者致電個唱出品人孫敬安查詢，他承認為Ken搞演唱會，將於3月26日假Star Hall開騷：「太太覺得Ken好慘，叫我支持佢幫吓佢。」

表現正常好聽話

上次Ken開騷已是11年前的事，問怕唔怕近年情緒反覆的他發台瘟？孫敬安說：「佢開會時表現好正常、好聽話，10年冇嘢做我都癲啦，依家有嘢做起碼有寄託，佢都想搞好演唱會，唔會胡思亂想神遊太虛，佢同我講今次盡地一煲，置諸死地而後生，佢仲好努力減肥，瘦咗20磅。」問對票房有冇信心？他說：「內部訂飛去咗幾百張，如果反應好會加一場，仲會分紅畀佢。」孫敬安揚言今次不是做生意，純粹幫Ken：「每人都有過去，大家應鼓勵Ken積極面對，唔應該踩佢。」

採訪：音樂組